Shillong, Jylliew, 07: Ki nongjngohkai pyrthei kiba hiar ïa ki hajar tylli ki mawkyndon ban leit peit kai ïa ka jingithiang jong ka jingkieng jri ba pawnam ha ka shnong Nongriat ki la ong ba ka shnong Sohra, Meghalaya ka long kaba jaka kaba shngain bad ki la ïaroh ruh ïa ka jinglong kaba bha jong ki trai shnong kiba trei kum ki Guide bad kiba im kamai jakpoh na ka kam jngohkai pyrthei ha kane ka shnong.
Hadien ka jingjia kaba sngewsih, ïa ki arngut ki shikurim, u Raja Raghuvanshi bad ka kurim jong u, ka Sonam, ka kynhun lum khubor ka Batesi TV ka la hiar sha ka shnong Nongriat ban ïakren markhmat bad ki nongjngohkai pyrthei kiba wan nabar ka jylla.
Da lade hi ki nongjngohkai pyrthei na ka jylla Punjab bad West Bengal kiba wan kai pyngngad sha Nongriat ki la ïaroh ïa ka jingithiang jong ka shnong Sohra, ka shnong Nongriat bad ïa ka jinglong kaba bha jong ki trai shnong.
Wat hapdeng ki jingshah pynbudnam sniew ïa ka kyrteng jong ka jylla Meghalaya hynrei ki trai shnong jong ka shnong Nongriat ki la ïathuh ba ka jingtuid jong ki nongjngohkai pyrthei kiba nabar jylla bad nabar ri ka la long ka bym lah shuh ban niew khamtam ha kum kine ki bnai ba ka jur bha ka jingwan jong ki nongjngohkai pyrthei hapoh ka shnong.
Kawei ka nongjngohkai pyrthei na ka jylla Orissa ka la wankai sha ka shnong Nongriat, ka shnong kaba dang hap hapoh ka East Khasi Hills District, Meghalaya ban leit jngoh ïa ka jingkieng jri kaba la bna nam bha.
Ka kynhun lum khubor jong ka Batesi TV kaba la ïakynduh ïa kane ka nongjngohkai pyrthei kaba wan hi marwei naduh ka jylla Orissa mynta ka sngi Saitjaiñ ka la ong ba ka tieng haba ka shang suwari marwei hynrei ka shim pat ïa ki lad jingïada da kaba shim ïa ki number kali, ki number jong ki iingbasa bad pyntip sha ki bahaing hasem bad kiwei kiwei de ki lad jingïada khnang ban lait na kino kino ki jingjia ha ka jingïaid lynti.
