Jowai, Jylliew 12: Hadien ba ka Hynñiewtrep Border Dispute Redressal Forum (HBDRF) ka la ïoh ïa ka jingujor na ki arngut ki Khasi Pnar na Block-1 kiba ym kwah ban pynpaw kyrteng, kaba la jia ha ka 6.6.2025 ha Ïew Myn-i ba arngut ki briew na ka jait bynriew Karbi, uwei uba tip kyrteng kum u Augustine Hanse bad uwei pat ym shym la tip kyrteng, hynrei la ong pat ba u dei u dkhot ka Karbi Students Association (KSA).
Ka kyrwoh khubor na ka HBDRF ka la ong ba kine ki Karbi ki la bat ïa kine ki Khasi Pnar bad ki la maham ban rah ïa uwei na kine sha Hamren Police Station da kaba kynnoh ba dei ma u ba donkti ban pynshit lane ban khot ban wer ïa ki Khasi Pnar ha Block-1 ban wan sha ka Rally ba khot pynlong da ka HBDRF ha Jowai ha ka 3.5.2025.
La ong ba nalor kane ruh, kitei ki Karbi ki maham bad pyntieng ïa ki ba kim dei shuh ban ïaleit ïawan sha kino kino ki jingïalang paidbah ne ban ïakren ïakhana bad ki Khasi Pnar kiba don sha Meghalaya.
“Lada don mano mano ba kylli ïa ki hato ki kwah ban don sha Assam ha kane ka jingïapynbeit pud ki dei ban ong beit ba ki kwah bad hun ban don hapoh Karbi Anglong Assam bad kim dei ban pynpaw ïa ka jingkwah ne jingthrang ïa ka hok jong ki ban don shapoh Meghalaya,” ïathuh ka seng HBDRF.
Ka la ïathuh ruh ba ki la maham tyngeh ruh ba ki Khasi Pnar ki dei ban register noh ïa ki jaka puta jong ki shapoh Karbi Anglong Autonomous Council Assam bad kumjuh ban apply ïa ki kot ki sla jong ki shapoh Assam bad lada kim leh kumta, ki lah ban shah beh noh shi syndon. La ïathuh ba ki Khasi Pnar ki dei ruh ban ngeit bad kohnguh beit ïa ka ei kaba maki ki Karbi ki ong bad hukum.
“Ki la maham ruh ba kim dei ban ïathuh ïa kane ka jingkren jong ki sha ki briew kiba don shane shapoh Meghalaya. Lada ki pyntip ne ïathuh ki lah ban shah pynïap ruh,” bynrap katei ka seng.
Ha kaba ïadei bad kane ka jingjia ka Forum ha ka 10 & 11.6.2025 ka la leit ujor sha u Deputy Commissioner, Abhinav Kumar Singh bad u Superintendent of Police Bah C. Syrti jong ka West Jaiñtia Hills District ryngkat ka jingthoh bad ha jingïakren ka Forum ka la kyntu ïa kine ki khlieh nongsynshar District ba ki dei ban shim khia ban ïakren bad ki bor District jong ka West Karbi Anglong ban pynneh pynsah ïa ka shongsuk shongsaiñ bad kine ki jingmaham bad jingpyntieng jong kine ki Karbi ïa ki Khasi kan ym jia bad u DC bad SP ruh ki la kular ban shim khia ïa kane ka kam.
Ka Forum lyngba u Chairman jong ka u Chandame Sungoh ka kyntu ïa ki paid Khasi Pnar baroh kiba don hapoh Meghalaya bad kiba don hapoh Block-I & II, nangta ïa ka sorkar, ki bor pulit, ki Sengbhalang bad ki paidbah ruh ki dei ban ïatylli ïa ryntih noh ban pynduh pyndam ïa kane ka jingshah lehbeiñ shah maham bad ka jingtieng jingrit mynsiem ki Khasi Pnar kiba shong basah ha Block-1.
“Ha kino kino ki kam ki jam, ki dorbar ne ki jingïalang ki Khasi Pnar nangne napoh Meghalaya bad kiba nangtei napoh Block-I ruh ki la tieng la rit mynsiem ïoh lap ki Karbi ha kano kano ka por ne ka jaka,” ong ka Forum.
Na ka liang ka Forum ka la ong ba kane ka dei na ka daw jong ka jingtieng ba wat ki bor sorkar ruh kim nud ban ïakren pyrshah bad ki nongïalam jong kiwei pat ki jylla, bad na ka daw ba ki Khasi Pnar ki burom palat ïa ka shongsuk shongsaiñ, kumta kiwei pat ki jait bynriew ki shim kabu noh ban maham bad pyntieng pynsmieij ïa ki briew Khasi Pnar kiba don sha katei ka thaiñ. “I kumba dei tang kita ki Karbi kiba dei ki briew, ma ngi pat ngi dei kum ki ksew. Tang ma ki kiba don hok ma ngi pat ngim donhok. Hato ym dei ba ngi don ha kajuh ka Riti Synshar ne kum ki nong India,” buh jingkylli ka Forum.
“Lada ngi tieng ngi shah jem kumne shi kumne shi junom ruh ki briew jong ngi kin im kin sah ha ka jingsyier bad jingrit mynsiem. Kumta la dei ka por ba ngin pynduh noh ïa ka jingtieng jingrit mynsiem bad ban kren ne pynpaw beit ïa ka hok jong ngi lada ka long kumno kumno ruh,” ong u Chairman ka Forum.
Ha kaba ïadei bad kane ka Forum ka kyntu ruh ïa ki paid Karbi ba ki dei ban burom ïa ki Khasi Pnar kiba dei ki trai ri trai muluk bad kim dei ban wanrah ïa ka jingsngewpher jaitbynriew ne ka jingïashun ïa bishni. Kim dei ruh ban pyntieng pynsmieij ïa ki Khasi Pnar bad kim don ka hok ban khang lymne maham ïa ki Khasi Pnar ban dawa ïa ka hok jong ki ban wanrah biang ïa ka Block-I & II na Assam sha Meghalaya kumba la kubur hi da ka sorkar Assam ba kane ka jaka ka dang don hapdeng ka jingïakajia bad kam pat long pura shapoh Meghalaya ne Assam.
