Shillong, Jylliew, 15: U Rangbah Shnong ka Khiehshnong, Sohra, u Dr. Shembhalang Kharwanlang, u la pynpaw ïa ka jingsngewkhia halor ka jingbym bat jutang jong ka District Medical & Health Office (DMHO) ïa ka soskular baladep ïasoi bad ka shnong ha kaba ïadei bad ka projek Hospital AYUSH.
Ha ka jingïakren bad ki lad pathai khubor ha ka sngi Saitjaiñ u Dr. Kharwanlang u la pynpaw ba ïa kane ka Hospital la lah ban pynurlong lyngba ka jingtrei shitom jong u MLA barim u Bah Titostarwell Chyne. Hadien kane, la ïasoi ïa ka jingïateh soskular hapdeng u DMHO bad ka shnong, ha kaba ki paidbah ki la ai jaka da ka mon sngewbha ban shna ïa ka hospital. Ïa kane la leh da ka jingïasngewthuh ba ïa ki lad aikam khamtam eh ïa ki kam kum ki Cleaner, Sweeper, Ward Boy bad Ward Girl bad Mali dei ban ai sha ki samla jong ka shnong Khliehshnong, Sohra.
U la pynshai ba watla ki kam kiba la kdew ki lah ban ym donkam ïa ki kyrdan pule hynrei la shim ba ki long kiba biang na ka bynta ki nongshong shnong, bad kata ka jingpynthikna ka la long ka nongrim jong ka jingai jaka. “Ka jingïateh ka la kren shai ba kiba bun na kum kine ki post kin leit sha ki trai shnong kiba lah ban trei ïa ki”, u la ong.
U Dr. Kharwanlang u la bynrap ruh ba ha ka por ba la pynbna ban thungkam ha u bnai Rymphang, 2024, ki nongïalam shnong ki la aiti ïa ka shithi pynkynmaw sha ka tnad ïa ka jingkular jong ka. Hynrei ynda la pynmih ïa ka result, ka la paw ba ym shym la burom ïa ki kyndon. Nangta la phah ïa ka shithi buddien, kaba kdew ïa ka jingbym lah jong ka tnad ban mang kyrpang ym duna 70% na ki kam na ka bynta ki nongshong shnong kumba la kular.
“Ngi la pan jingshai na u DMHO ba balei la leh klet ïa ka jingïateh kular,” ong u Dr. Kharwanlang bad bynrap, “ngi dang ïai neh ha ka jingïateh kular kaba ngi la ïasoi bad ngi khmih lynti ba ki bor ba dei peit khamtam kito kiba don ha ki kyrdan ba don ka jingkitkhlieh kin leh da ka mynsiem kaba bha.”
Ka shnong ka la pynpaw ruh ïa ki jingeh ha kaba ïadei bad ki jaboh jabaiñ jong ki hospital, da kaba maham ba khlem ka jingpynkhuid bha ïa ki jaboh jabaiñ na ka jingtreikam jong ka hospital ka lah ban ktah ïa ki tyllong um dih jong ki paidbah. Ki la kyntu ïa ki bor pynïaid ban pynthikna ïa ka jingpynïaid ïa ki jaboh jabain kiba paka shwa ban pyntreikam ïa katei ka jaka.
U Dr. Kharwanlang u la kren shai ba ka shnong kam pyrshah ïa ka jingplie ïa ka Hospital.
“Ngi donkam shisha ïa kane ka hospital. Hynrei ngi ban jur ba ïa ki kyndon jong ka jingïateh dei ban burom katkum ka jingïakut,” u la bynrap.
