Shillong, Jylliew, 16: U Superintendent of Police (Traffic) ka East Khasi Hills District u K. Prasad u la pynthikna ba ka tnat Pulit ka la ïoh ïa ka jingbthah na u Commissioner ka tnad Transport ha kaba ïadei bad ka jingpynjari kham pyrkhing ïa ki kyndon pynïaid kali.
Ha ka jingïakren bad ki lad pathai khubor ha ka Lah Sngi u Blei u Prasad u la pynpaw ba da kaba bud ryntih ïa kane ka hukum, la bthah ïa baroh ki Pulit Traffic ha ka District ba kin pynlong ïa ka jingkhynra kaba bniah bad lada lap ïa kino kino kiba pynkhein kin shah pynshitom katkum ki kyndon jong ka aiñ.
“Lada lap ïa kino kino ki jingpynkheiñ aiñ ha kine ki jingkhynra yn sa leh da kaba tyngeh katkum ka aiñ,” u la ong.
U la pyntip ruh ba ki Traffic Branch kiba don hapoh ka District ki la peitngor bha mynta ban buddien ïa ka jingshim wai beaiñ ïa ki kali ne ki scooty jong ki riew shimet. U la ban jur ba lada lap ïa kino kino kiba pynïaid khlem ki kot ki sla ne ki Permit ba biang kin ngat ha ka jingshah pynshitom katkum ki kyndon jong ka aiñ.
U la pynpaw ka jingkyrmen ba watla ka jingpynjari ïa ka jingmaham ka long mynta tang ha East Khasi Hills, hynrei yn pyntreikam ha kajuh ka rukom ha baroh kawei ka jylla ïa kane ka jingbthah la pynmih da u Commissioner ka tnad Transport.
Shuh shuh u SP u la maham ba lada lap ïa kino kino ki bym kohnguh ïa ki kyndon ba la kdew ha ka hukum jong u Commissioner kin shah pynshitom katkum ki kyndon.
