Shillong, Jylliew 17: Ka Khasi Students’ Union – Central Executive Council hynne ka step ka la ïoh ban kynduh ïa Registrar ka National Law University Meghalaya ban pynsngew halor ka advertisement ba mih ha 09.06.2025 halor ki 34 tylli ki post jong Assistant Professor ha NLU.
Katkum kane ka advertisement, ka jingdonkam (eligibility) ba ka NLU ka buh ka long shaba palat ban ïa kiei ki kyndon ba ka UGC ka buh ne kiwei kiwei ki 26 NLUs ha ri India ki ju leh bad kine kiei kiei baroh ki dei ki jingleh u Vice Chancellor khnang ban pynduh ïa ki trai jylla ba kin ïoh ban aplai.
Ki kyndon ba donkam (entry level) na bynta ka post Asst. Professor dei Academic Level 10 hynrei katkum ka advertisement ka NLU ka pan Academic Level 11. Ban ïoh academic level 11, ki nonghikai ki dei ban ïoh rung shuwa kum Asst. Professor bad hadien ba la trei 4 snem shaneng kin sa ïoh promotion sha ka Academic level 11. Ha kaba ïadei bad kane kumno ba ka NLU kan buh ïa ka kyndon Academic Level 11 bad kane ka la pynkheiñ ïa ka kyndon UGC.
Ha ka kyrwoh jong ka seng la ong ba la ju ïohi barabor ba ki nonghikai bym dei Khasi ba trei ha NLU mynta ki thoh artikle halor ka jingpyrshah ka jong ki ïa ka Meghalaya Reservation Policy bad ki thmu ruh ban pynkylla ïa ka reservation policy ha NLU ba kin ïoh kam pura ma ki bad ba kin pynduh ïa ki trai jylla bad dei halor kane ka nongrim ba une u VC u buh ki kyndon kiba eh khnang ba trai ri trai muluk ki nym ïoh ban rung ha katei ka University khnang ba ki kam bamsap bad ki kam jyrsieh jong u VC kan dang ïaid shakhmat khlem don ba pynthut.
Hadien ba ka Seng ka la sei madan ïa ki kam bamsap jong u VC bad ki kam thep tuh ïa ki briew ki jong u ha NLU, la bun ngut na ki nonghikai kila resign noh na ka kam da kaba sheptieng ïa ka jingtohkit. Ka jingleh ka jong u VC mynta ïa kane ka advertisement ka dei beit thik ba nym don ba ïoh ban aplai bad ba u dang ïoh ki briew jong u ban thep tuh khnang ba un lah ba tap eit miaw ïa ki kam tuh ki jong u.
Ka Seng ka la kyrpad ïa Registrar ka NLU ban pynkylla ïa ki kyndon (criteria) na bynta ka kam Asst Professor ha NLU bad ban bud ryntih ïa ki kyndon jong ka UGC. Ban pynshongnia bad pynshong nongrim ïa kane ka jingdawa jong ka Seng, ka Seng kum ban ai nuksa ka la tyrsat ruh ïa 10 tylli ki advertisement jong kiwei ki NLUs jong kiwei ki jylla kiba pynlait advertisement jong ka post Asst. Professor kiba ïaid thik katkum ka kyndon UGC.
