Indore, Jylliew, 18: Ka kynhun Pulit na Meghalaya kaba tohkit halor ka jingshah pynïap jong u nongkhaii heh spah na Indore u Raja Raghuvanshi ha ka sngi Balang ki la leit iuhkjat ha iing kmie jong ka Sonam Raghuvanshi ban pynlong ïa ka jingtohkit kaba bniah ïa ki bahaiing hasem jong ka.
Katkum ka jingïohi kiba sakhi, ki Pulit ki la don ha iing kmie jong ka Sonam kumba ar kynta eiei ban tohkit bniah shaphang ka Sonam na ki bahaiing hasem jong ka.
Ka kynhun tohkit ka la poi ha ing kmie ka Sonam ha Govind Nagar Kharcha. Hadien ba ki Pulit ki la rung shapoh, la lap ba ka jingkhang ka la khang na shapoh khnang ban ym don mano mano ruh ban ïoh rung, la ong ki nongsakhi.
Mar kumta ki Pulit ki la mih noh na kane ka jaka bad u hymmen jong ka ruh u Govind kiew ha ka kali bad mih noh na kane ka jaka.
Ha ka jingïakren bad ki lad pathai khubor khlem da ïathuh bniah eiei u Govind u la ong ba ki Pulit ka Meghalaya ki la shu kylli ïa ki jingkylli kyllum na u bad na ki bahaiing hasem shaphang ka jinglong jong ka Sonam.
Haba kylli shaphang ka khubor ba ka Sonam ka ju ïakren slem bha ha ka phone bad uwei u briew uba la tip kyrteng kum u Sanjay Verma ba u Raja Raghuvanshi un shah pynïap, u Govind u la ong ba um don jingtip eiei shaphang kata.
Dang shen, ki bahaiing hasem jong u Raja Raghuvanshi ki la dawa ba baroh ki bahaiing jong ka Sonam ki dei ban leh ïa ka Narco Test khnang ba ki jingshisha kin paw halor ka kam pynïap briew. Halor kane ka jingdawa, u Govind u la ong ba um shym la leh pop eiei ruh bad u long uba kloi ban shah tohkit ha kano kano ka rukom lada mano mano ki don ka jingartatien.
Ki Pulit ka Meghalaya ki la leit ruh sha ka iing jong u Raja Raghuvanshi ha Sahakar Nagar ha ka miet sngi Baar ban rekod ïa ka jingkren jong ki bahaiing hasem jong u.
Ha kane kajuh ka sngi, ki Pulit ka Meghalaya ki la ïalam ïa ka Sonam bad ïa ki lai ngut kiba donkti ban pynwandur biang ïa ka jingshah pynïap jong u Raja ha Wei Sawdong, Sohra, ha ka 23 tarik, Jymmang.
Ki nongleh kam bymman ba kynthup ïa ka Sonam, u samla jong ka, u Raj Kushwaha bad lai ngut ki paralok jong u, u Akash Rajput, Vishal Singh Chauhan bad ïa u Anand Kurmi la ïalam sha ka jaka ba la jia ka jingshah pynïap kaba long kum shi bynta ka jingtohkit kaba bniah jong ki Pulit.
 | ReplyForwardAdd reaction |
