Shillong, Jylliew, 18: U Inspector of Post Office, East Garo Hills Division u N. Hemanta Meitei u la ujor sha ki Pulit ba u Doma K. Sangma uba trei kum u Sub-Post Master jong ka Nongalbibra, Sub Post Office, South Garo Hills u la pyndonkam bakla ïa ka pisa jong ka ophis kaba kot T. Rs. 27,24,373 lak.
U nongujor shuh shuh u la pyntip ba u Post Master jong ka Tura Head Office, West Garo Hills ha ki lai tylli ki shithi, kata, ha ka 2 tarik Rymphang, 2025, 18 tarik, Rymphang, 2025 bad 23 tarik, Ïaiong, 2025, u la bthah /pynkynmaw ïa u Doma K. Sangma ban pynphai ïa ka pisa ba la palat ïa kaba u Doma um shym la kohnguh satia.
Ki bor pynïaid ki la ujor sha ki Pulit ban pyntip ba ha ka janmiet 16 tarik, Jylliew uwei u briew u bym lah ban ithuh durkhmat u la tuh ïa kawei ka portable speaker na ka Iingmane Presbyterian ha Saw Mer Shiteng, Upper Shillong. Ïa kane ka jingjia la ïoh ring dur ha ka CCTV.
Ka Nabita Upadhya ka la ujor sha ki Pulit ba ha ka 16 tarik, Jylliew ki runar bym lah ban ithuh durkhmat ki la tuh ïa ka saikil u khun jong ka kaba shongdor kumba T. 10,000 na ka iingsah ha Upper Mawprem, Shillong.
U Satyam Yadav u la ujor ba ha ka 16 tarik, Jylliew, ki runar bym lah ban ithuh ki la rong tuh ïa ki waïar ba la pyndait na ka bynta ka Smart City Project ha VMD Red Cross, Shillong.
