Shillong, Jylliew, 18: Ka Iingbishar Meghalaya High Court ha ka sngi Balang ka la hukum ïa ka National Highway Authority of India (NHAI) ban phah ïa ka kaphod kaba bniah ha kaba ïadei bad jingshna pynbna ïa ka surok Jowai-Ratacherra kaba jrong 102.255 kilomitar bad ïa ka surokbah National Highway-6 shwa ka 18 tarik, Nailar.
Ha ka jingpynmih hukum hadien ba la shong bishar ïa ka PIL, ka division bench ba kynthup ïa u Chief Justice IP Mukerji bad u Justice W. Diengdoh ka la ong, “da kaba pyrkhat ïa ki jingai jingmut ba la ai bad ruh da kaba shimkhia ïa ka jinglong jingman jong ka suinbneng mynta, ngi ai por ïa ka NHAI haduh ka 18 tarik, Nohprah, 2025 ban ai ïa ka kaiphod kaba bniah.”
“La bthah ïa u Amicus Curiae ban khmih bniah ïa ka jingïaid jong ka kam bad ban phah la ka jong ka kaiphod, lada donkam, ha katei ka tarik ba la buh sngi,” ka la bynrap.
Ka jingshna pynbha ïa ka surok ka la sdang naduh ka 22 tarik, Lber, 2024 da ka NHAI. La pynkhamti ïa ka kam ha ki arngut ki kontraktor ba kynthup ïa ka Purvanchal Buildtech Pvt. Ltd. na ka bynta ban shna ïa ka surok kaba jrong 51 kilomitar (na Jowai sha Wahïajer) katba ka Dhar Construction Company ka la ïoh ban pyntrei ïa ka surok na Wahïajer sha Ratacherra kaba jrong 51.255 kilomitar.
Ka bench ka la buh jingthoh ïa ka kaiphod ba la aiti da u Shoumen Sengupta, Advocate ka NHAI uba la pyntip ba ha ka bynta kaba 51 kilomitar la lah ban pyndep haduh 75 percent ïa ka kam bad ha kawei pat ka bynta kaba 51.255 kilomitar la lah ban pyndep haduh 80 percent.
U Muktiar u la ong na ka daw ka jingsniew jong ka mariang ym shym la lah ban trei pynstet ïa ka kam kumba la kular ha jingshong bishar ba mynshwa ïa kane ka kam. U la kyrpad ban pynjlan shuh shuh ïa ka por na ka bynta ban ai ïa ka kaiphod ba pura.
