Shillong, Jylliew, 19: Ka District Magistrate jong ka East Khasi Hills District ka Kong RM Kurbah ha ka sngi Palei ka la pynjari da ka Section 163 BNSS kaba mana tyngeh ïa kino kino ki kynhun ban khrong pisa beain na iew na hat hapoh u pud u sam jong ka East Khasi Hills.
Katkum kane ka hukum, ka District Magistrate ka la ong, “kumba la paw ha ki lad pathai khubor ba ka don ka jingkhrong pisa beain na iew na hat da ki kynhun bapher bapher ha East Khasi Hills District. Kum kane ka jingkhrong pisa kaba khlem da ïoh jingbit na ki bor ba dei peit ka dei ka kam runar bad kaba lah ban shah pynngat ha ki kyndon aiñ.”
“Da ka itkiar ba la pynkup bor ha nga hapoh ka kyndon 163 jong ka BNSS, nga mana ïa ka jingkhrong pisa ha East Khasi Hills District bad kino kino kiba pynkheiñ ïa kane ka hukum, kin ngat ha ka jingshah pynshitom hapoh ka Section 308 jong ka BNS bad ka Section 223 jong ka BNS,” la maham ka District Magistrate.
Namar ka jingkyrkieh jong ka kam, kane ka hukum kaba la pynjari kan treikam noh mardor tad haduh ban da pynbna da kumwei pat.
