Shillong, Jylliew, 19: Ka jingkieng nar kaba pynïasoh ïa ka surok Silchar-Kalain ka la kdiah ar lyngkhot ha ka sngi Balang ha ka por kumba 2:00 baje mynstep.
Da ki spah tylli ki kali kiba wan na ka bynta jong ka Jylla Meghalaya ban leit sha Barrak Valley bad sha ka jylla Tripura bad Mizoram ki la sahkut ha ka dheng kali hapdeng surok.
Katkum ka jingtip ba la ïoh lum la ïathuh ba kane ka jingkieng kaba don ha Wah Harang, ka dei kaba dang shu plie dang kumba shi bnai hadien ba ladep ban maramot ha ka jinglut kaba kot 1.37 klur.
Ki bor synshar jong ka Ribhoi District ki la bthah ïa ki kali kiba thmu ban leit sha Silchar ba kin ïaid noh na ka surok Jorabat kaba mih sha surok Nagaon-Haflong.
