Shillong, Jylliew, 19: U Superintendent of Police ka East Khasi Hills Bah Vivek Syiem ha ka sngi Palei u la ïathuh ba ïa ki wait lyngngun ba la lap ha kaba pyndonkam ban pynïap ïa u Raja Raghuvanshi la phah sha ka Central Forensic ban pynshisha la ka dang don neem kano kano ka jingkhah snam ha ka wait.
“Ngi la phah leh test khnang ban pynthikna kum ka sakhi. Ka jingthmu jong ngi ka long ban pynngat kyndon hapoh 90 sngi,” la ong u SP ha ka jingïakren bad ki lad pathai khubor.
Ka District & Session Court Shillong ha ka sngi Palei ka la ai bor ban set ar sngi ha along ki Pulit ïa ka Sonam Raghuvanshi bad ïa u Raj Kushwaha katba ïa ki lai ngut kiba kynthup ïa u Akash Rajput, u Vishal Singh Chauhan bad u Anand ka Kashari ka la aibor ban set 14 sngi ha Judicial Custody ha kaba ïadei bad ka jingshah pynïap u Raja Raghuvanshi, u nongkhaii heh spah na Indore uba la shah pynïap katba u dang wankai honeymoon sha Meghalaya.
Shwa kane, ha ka por shiteng sngi, ki Pulit ki la ïalam ïa baroh san ngut sha Shillong Civil Hospital na ka bynta ban leh ïa ka medical examination shwa ban rah tian bishar ha Kashari.
Ka kynhun Pulit jong ka Special Investigation Team kaba don mynta ha Indore ka la tohkit ruh ïa u nongniah taksi u la pynpoi ïa ka Sonam na Indore sha Uttar Pradesh hadien ka jingshah pynïap u Raja Raghuvanshi.
“(Kumba ngi la kyrpad, ngi la ïoh ar sngi ban set ha Police Custody ïa ka Sonam bad ïa u Raj katba lai ngut kiwei pat u Akash Rajput, u Vishal Singh Chauhan u Anand Kurmi la phah set 14 sngi ha Judicial custody,” la ïathuh u SP ka East Khasi Hills district Bah Vivek Syiem ha ka jingïakren bad ki lad pathai khubor.
“Tang shu wan ka kynhun jong ngi (na Indore) ngin sa ïoh shuh shuh ïa ki jingtip kiba kham bniah, ngin sa tohkit biang ïa ki lai ngut hadien,” u la ong.
Katkum ka jingong jong u, ïa ka Sonam bad u Raj yn sa rah ban tian bishar ha Kashari ha ka sngi Saitjaiñ.
Ha ka sngi Baar ka SIT ka la lah ban pynwandur biang ïa ka jingshah pynïap, ha kaba la lap sa kawei ka wait na kshaid Wei Sawdong.
Ka SIT ka la leit sha kiba bun ki jaka da kaba sdang na parking lot ha Mawlakhiat ha kaba ki la pynieng ïa ki ar tylli ki thuk thuk ar shaka ba shu shim wai tad haduh ban da poi sha parking lot ha Wei Sawdong ha kaba la pynïap ïa u Raja.
Katkum ka jingong jong ki Pulit, ki saw ngut ki pynïap ïa u Raja hajan ka parking lot hajan Wei Sawdong bad bret pat ïa ka met sha riat ha ka 23 tarik Jymmang.
Haba kylli, u Bah Syiem u la ong, “tang shu kut ki ar sngi, ngin sa sdang shuh shuh ban pynlong ïa ka jingtoh bad lada donkam ngin hap ba pan ïa ka Police Custody.:
U la ong ruh ba ki Pulit ki dang pyndep shuh shuh ïa ki jingtohkit kiba bniah ha Indore.
“Ngi ladep tohkit ïa u Govind Raghuvanshi bad ïa ka kmie jong u Govind bad mynta ki ladep ban pynthikna ïa uba niah kali, uba la pynpoi ïa ka Sonam sha Uttar Pradesh,” u la bynrap.
U SP u la ong ba u Sanjay Verma ka dei tang ka kyrteng thok ba la paw ha ka ‘true caller’ hynrei u nomber u dei hi jong u Raj Kushwaha.
U la ïathuh ba ka jingïakren phone hapdeng u Raj bad ka Sonam ka long da ki spah sien.
Shuh shuh u Bah Syiem u la pyntip ba ki Pulit ki dang wad sa kawei ka mobile phone ba la pyndonkam da ka Sonam.
“Ngi ngeit ba sa kawei ka mobile phone, ki ksiar ki ksah bad kiwei kiwei ki tiar, kiba ka Sonam ka la iehnoh shadien. Ngi kyrmen ba ka kynhun kan sa leit sha ka jaka ba sah ka Sonam da ka jingthmu ban shimti ïa ki tiar ba la ieh da ka Sonam hynrei ki Pulit kim shym la lap eiei namarba la shim noh da mano re mano bad ka kynhun mynta ka dang don sha Indore ban pynthikna mano ba donkti ban shim ïa ki tiar bad shano ki don mynta,” u la ong.
Ha kaba ïadei bad u nongpyndonkam Instagram uba la pynsaphriang paidbah ïa ki video jong ka Sonam bad u Raja katba ki dang kiew ïa ki mawkyndon ha Nongriat, u Bah Syiem u la ong, “ngi la pyrshang ban ïakren hynrei um shym la ai jubab eiei ai ngi. Ngi la thoh ruh sha ka Instagram ban ai ïa ngi ka jingtip kaba bniah khnang ba yn dup lah ban shim ïa ka sakhi na u ruh ban ïoh buh rekod.”
U SP u la ïathuh shuh shuh ba la buh bun tylli ki jingkylli ha ka jingtohhkit khnang ban ïoh ïa ki jingtip kiba shisha bad kiba lah ban ïoh ïa ka dur kaba shai.
