Shillong, Jylliew 20: U Chief Secretary ka jylla u Bah D P Wahlang shen un sa aiti ïa ki jingmynjur halor ki sienjam ba la shim da ka Sorkar Jylla ha kaba ïadei bad ka kaiphod jong ka expert committee ha kaba ïadei bad ka bhah thungkam ne ka State Reservation Policy, hapoh ka 31 tarik u bnai Nailur.
“Ka kynhun Myntri ka la aiti ha nga ban pule bniah halor kane ka kaiphod bad ha ka 31 tarik u Nailur ngan sa aiti ïa ka kaiphod,” ong u Bah Wahlang haba kren sha ki lad pathai khubor ha ka sngi Thohdieng.
“Hadien ba la dep ban pule bniah ïa ka kaiphod ka expert committee, ngan sa ai ïa ka jingmynjur kaba pura bad kiwei pat ki sienjam ba dei ban shim da ka sorkar bad kane kan long ha shwa ka 31 tarik u Nailur,” u la bynrap.
Lah ban pynkynmaw ba ha ka 13 tarik mynta u bnai, ka kynhun myntri ka sorkar jylla ka la aiti ha u Bah Wahlang ban pule bad ban khmih bniah ïa ka kaiphod jong ka expert committee ha kaba ïadei bad ka jingbishar kam halor ka bhah kam jong ka jylla ne ka state’s job policy.
Ha kaba ïadei bad kane na ka liang jong u Myntri ka sorkar u Bah Paul Lyngdoh, u la ïathuh ba kane ka kaiphod ka long kaba bun bha bad ïa kane yn sa wanrah ha khmat ka cabinet.
“Ïa ka kaiphod kaba pura yn sa wanrah hapoh ka Ïing dorbar thaw aiñ ka ban long ha u bnai Nailar, 2025,” ïathuh u Bah Lyngdoh.
Ïa kane ka expert committeee la khlieh da u Justice (Retired) Mool Chand Garg kaba la thaw ruh da ka sorkar ha ka 12 tarik u Nailar, 2023, ban khmih bniah ïa ka bhah thungkam kaba la mih ki jingdawa na kiba bun ki liang ha ka jylla.
