Shillong, Jylliew 22: Lai ngut ki briew ba kynthup ruh ïa kawei ka khynnah samla kaba la 16 snem ka rta ki la shah kem halor ka jingkynnoh ba ki la donkti ha ka kam pajut sohshkor ksiar na ki arngut ki heprit kynthei ha nongbah Shillong.
U SP ka East Khasi Hills Bah Vivek Syiem ha u kyrrwoh ba la phah ha ka Sngi u Blei u la ong, “kawei ka khynnah kaba la 16 snem, 9 bnai ka rta, u Mabanker Jyrwa, 23 snem ka rta na Jaïaw Lansonalane bad u Charles Myrthong, 20 snem ka rta na Riatsamthiah ki la shah bat ha ki Pulit ka Mawlai, East Khasi Hills.”
U la ïathuh ruh ba ladep ban kurup ïa ki tiar hadien ba la ïalam da ka khynnah samla bad kiba shah kynnoh na Mawbah, New Oscar Jewellers Shop bad la kurup ruh ïa ki tiar kumba ka dei ban long.
Kane ka jingïoh kem ïa ki ka long ruh halor ki jingujor ki artylli ki ejahar ha ka 18 tarik bad 20 tarik mynta u bnai.
U la ïathuh ruh ba ka Kong Elinda Marbaniang, ba shong basah ha Mawlai Nongkwar Block ka la ujor ba ha ka 18.6.2025 hapdeng ka por 1:30 nohphai sngi bad ha ka 2:00 baje nohphai sngi ka khun kynthei ba dang 9 snem ka rta katba ka dang wanphai na skul ka la shah buddien ha kawei ka khynnah kynthei na ka lynti ïaid kjat ha Wahumkhrah ha kaba ka la kylli ia ka khun jong ka, la ka don jingtip eiei neem shaphang u Adrian uba dang pule Class-III ha kaba kane ka khynnah rit ka la ong ba kam ithuh satia.
U SP u la pyntip ruh ba ka khynnah samla ka la bud ïa ka khynnah rit haduh Mawlai Nongkwar Block-2 bad ka la ktah ruh ïa ki shkor jong ka bad da ka bor ka la pajut ïa ki sohshkor ksiar bad phet krad na kane ka jaka.
Ha kawei pat ka liang u SP u la ïathuh ruh ba ka Sumardiam Kharlukhi na ka shnong Mawlai Nonglum ka la phah ka jingujor ban pyntip ba ha ka 20/6/2025, hapdeng ka por 4:00 baje bad 4.30 baje janmiet, lai ngut ki briew bym lah ban ithuh durkmat, ha kaba kawei ka dei ka kynthei bad arngut ki shynrang ki la wan sha ka ïing jong ka ha kaba ka khun jong ka kaba dang 9 snem ka rta ka dang ïalehkai shabar ha kaba kawei na ki kynthei ka la pajut ïa ki sohshkor bad phet krad na kane ka jaka.
