Shillong, Jylliew, 23: Ka kynhun Special Investigation Team (SIT) jong ka tnat Pulit Meghalaya ha ka shiteng sngi jong ka Lah Sngi u Blei ka la kem ïa uwei u briew uba la tip kyrteng kum u Lokendra Singh Tomar uba sah ha ka shnong Gwalior, Madhya Pradesh haba buddien halor ka jingshah pynïap jong u nongkhaïi na Indore u Raja Raghuvanshi.
U kyrwoh ba la phah da u Superintendent of Police ka East Khasi Hills Bah Vivek Syiem u la ïathuh ba ïa u Tomar ka SIT ka la kem na Gwalior, hadien ka jingkyrpad jong ka SIT ïa ki Pulit jong ka Gwalior.
“U dei u trai jong ka iing mala ha Dewas Naka ba ka Sonam ka la sah shipor katba ka dang rieh ha Indore,” la pyntip u SP.
“U briew ba la shah kynnoh (Lokendra Singh Tomar) u la mih na Madhya Pradesh ha ka 16 tarik, Jylliew, 2025 ban leit sha Uttarakhand. Na Uttarakhand u la leit sha Gwalior ha ka 22 tarik, Jylliew 2025,” la bynrap u SP.
“Ïa mynta, ka kynhun ba la ïaphiah jong ka SIT ka la mih na Indore ban leit sha Gwalior ban kem ïa uba la shah kynnoh, ha kaba yn sa tian bishar ïa u hakhmat ka Kashari ha Gwalior ban ïoh jingbit ban wanrah ïa u (sha Shillong). Ïa une uba la shah kynnoh la thwet ha kaba ïadei bad ka jingpynjot bad ka jingbuhrieh ïa ki tiar/ki sakhi sabut kiba kongsan bha ha ka jingjia,” u la ong.
“Baroh lai ngut kiba la shah kem yn sa wanrah ha ka Sngi Balang sha nongbah Shillong,” u la ong shuh shuh.
Shwa kane, ki arngut kiba la shah kem ki long u Silome James bad u nongap pahara.
