Shillong, Jylliew, 24: Ka Executive Committee ba la ïalam da ka Voice of the Peoples Party (VPP) ha Khasi Hills Autonomous District Council (KHADC) ha ka sngi Baar ka la wanrah ïa ka mang tyngka kaba tam haduh T. 5,24,640 na ka bynta ka Financial Year 2025-2026 wat hapdeng ka jingpyrshah jong ka Liang Iatei.
“Ia ka jingtyrwa ban pynlut la mang T. 227,48,35,620 kaba kham duna ïa ka jingïoh lum khajna da ka Council kaba long T. 227,53,60,260,” la pyntip u Executive Member uba khmih ïa ka tnat Pla Tyngka u Bah Seiborlang Warbah haba wanrah ïa ka Mang Tyngka ha ka Dorbar Lyiur kaba la sdang ha ka sngi Baar.
Ïa ka mang tyngka la wanrah hadien ba u Chairman jong ka Council u la rai ban shu pynlong da ka jingïathep vote hadien ba la mih ka jingpyrshah na ka Liang Ïatei pyrshah ïa ka rai jong ka Executive Committee ban pynrung lang ïa ka Supplementary Demand ha ka mang tyngka ba pura, ïa kaba ki kam ba ka dei kaba long beain bad kaba long pyrshah ïa ka riti synshar.
Ha ka jingkren halor mang tyngka, u Bah Warbah u la kular hakhmat ka iing ba ka Executive Committee (EC) kan pyrshang ban wad ïa ki lad ki lynti kumno ban pynjanai ïa ka jingïoh lum khajna jong ka Council bad ban peitngor ruh halor ka jingpynlut ksan ïa ki kam bym sohkhaw.
U EM u la ong ruh ba kane ka EC ba mynta kan pynthikna ïa ka jingsynshar kaba khuid bad kaba bha bad ban pynkhlaiñ ïa ka jingïohlum pisa jong ka Council.
U Bah Warbah u la pynbna ruh ba ka EC ka la rai ban pyndam noh ïa ka jingaiwai ïa ki khyrdop khlaw.
“Ngi la rai ban lum hi noh ïa ka khajna na ki khyrdop khlaw,” u la ong.
Ban pynduna shuh shuh ïa ka jingpynlut, u la ong ba ka EC ka la rai ba ka jingshon ïa ki Trading License yn sa leh hi noh da ka Department bad kane kan pynthikna ba ka khajna kaba long kumba T. 60 kan poi sha ka Council.
Katkum ka jingong jong u, ka Council kan sa pynmih noh da ka rukom siew online halor ka Professional Tax ha ki tnat treikam bapher bapher.
U Bah Warbah shuh shuh u la pyntip ba ka EC ka la rai ban sa khmih bniah biang ïa ka Buidling Bye-law na ka bynta ka jingmyntoi jong ki paidbah.
“Ngi la thaw ïa ka Recruitment Committee ban pynbeit ïa ka jingthungkam hapoh ka Council,” u la bynrap.
Shuh shuh u la pyntip ba ka Sorkar Jylla lyngba ka 15th Finance Commission ka la pyllait ïa ka pisa na ka bynta u snem 2020-2021 bad 2021-2022 kaba dei na ka Tied 1st Installment.
Katkum ki kyndon na ka bynta ka jingpyntreikam ïa ki skhim ba la mang hapoh ka 15th Finance Commission, ïa baroh ki jingtyrwa yn hap ban thep ha ka E-gram Swaraj Portal shwa ban pyllait pisa sha ki ADC. Hynrei, na ka daw ba ki don ki jingeh, ka la don ka jingslem ban bud ryntih ïa ki kyndon ba la bthah.
U Bah Warbah u la pyntip ruh ba ha u bnai Nohprah, 2024, ka Council ka la ïoh pdiang T. 12.15 klur kum ka bhah banyngkong hapoh ka Untied Grant na ka bynta u snem 2021-22, hadien ba la thep ïa ki skhim hapoh ka Portal.
“Ka bhah kaba ar na ka bynta u snem 2021-22 (na ka bynta ka Tied bad Untied) ladep ban thep,” u la ong bad bynrap, “ka jingthep ïa ki skhim bad ki jingtyrwa na ka bynta u snem 2022-23 ruh ka la sdang. Ngi dang pynkhreh ban phah sa ïa ki Utilization Certificate jong ki Grant ba ladep ban pyntreikam bad ngi khmihlynti ba ka Sorkar Pdeng kan sa pyllait noh kham kloi ïa ka pisa ba donkam.”
