Shillong, Jylliew, 26: Ka Jaiñtia Border Area Committee (JBAC) kaba long ka shatri jong ki kynhun bapher bapher kiba kynthup ïa ka Synjuk ki Waheh Shnong Ri Jaiñtia, ka KSU, FKJGP, JSU, JSM bad kiwei kiwei ha ka sngi Palei ki la dawa ïa ka Sorkar ban buh da ka Temporary Outpot ha ka shnong Lapangap, ha ka jaka ba ka Karbi Anglong Autonomous Council (KAAC) ka la thung ïa ki tynrai dieng kaba la tip kum ka ‘Lum Umchyrngan’.
Ïa kane ka jingdawa ka Committee ka la phah sha ka Sorkar lyngba ka Additional Deputy Commissioner jong ka West Jaiñtia Hills ka Kong B. Blah.
Katkum ka dorkhas ba ladep aiti ki la pynpaw ïa ka jingsngewdiaw halor ka jingïaibteng ka jingïakajia khappud kaba manla ka por hapdeng ki jait bynriew Karbi na Assam bad ki Khasi Pnar na Meghalaya kumba la jia ha ka sngi Balang bad kane ka la wanrah ïa ka jingshong syier ïa ki briew kiba sah ha khappud.
Ka Committee ka la ai khublei ïa ka jingkloi jong ka Sorkar naduh ki bor synshar district bad haduh u Myntri Rangbah ka jylla kiba la shimkhia manla ka por ban ïakren na ka bynta ban wanrah ïa ka jingïasuk hapdeng ki ar jaitbynriew.
U Bah A. Lipon u la ong ba ka Assam ka kwah ban knieh jubor ïa ki jaka puta kiba dang dei ki jong ka Meghalaya, kumta la kyntu ïa ka Sorkar ba kan buh noh da ka Temporary Out-post ha Lapangap bad ki Pulit ym duna ïa ka 40 ngut ryngkat ki tiar ba biang, khnang ba ki nongrep kin ïoh ban pyndep ïa ka thung ka tep.
U la pyntip ba ka shnong Lapangap ka la rai ban ai ïa ka jaka kaba biang na ka bynta ki Pulit da kaba ong ki paid Karbi ki juh wan ban kyntur pud sha Meghalaya da ka jingsynran lang jong ki Pulit Assam.
