Shillong Jylliew, 26: Arngut ki dkhot jong ka seng kieng atieng Hynñiewtrep National Liberation Council (HNLC) ba la shah kheiñ beaiñ ki la wan pyndem noh ïalade hakhmat u Superintendent of Police jong ka Eastern West Khasi Hills.
U Dibarius Jyrwa (32 snem) bad u Ridor Lyngdoh Nonglait (30 snem) ki la phah ba ki la shah ïalam bakla ha u Samuel Wahlang Pahsyntiew, uba la shah thwet ha ki Pulit halor ka case ba la register ha Shillong Sadar Police Station kaba ïadei bad ka jingpynbhtei bom IED hajan ka Shillong Syndicate Bus Stand IED, ban leit pynïasoh bad ka HNLC. Ki la kam ba ki la phet sha Bangladesh bad u Bah Pahsyntiew.
Katkum ka jingïathuh jong u Superintendent of Police, kine ki arngut ki dkhot ba la wan pyndem ki la ïathuh hadien ba la pynïasoh bad ka HNLC la shu kam da ki kam barit baria bad ki kam rep, ïa kaba kim sngew ïahap satia bad ki nongrim ba la pynpaw da ka seng.
Kine ki arngut ki la pynpaw ïa ka jingsngewsih bad jingbym sngewhun ïa ki kam ba la bynshet ha ki da ki nongïalam ka HNLC ha ki 15 bnai ba la leit noh. Ki la rai ban phet noh na Bangladesh ha ka 20 tarik Jylliew, 2025, da ka jingthmu ban wanphai biang sha ka imlang sahlang bad ki da pynpaw ruh ïa ka jingsngewsih ba ki la leit ban pynïasoh bad ka HNLC.
U SP u la ñiew ïa kane ka jingwan pyndem kum ka jingjia kaba kongsan. Ïa kine ki arngut la kylli jingkylli bad la buh jingthoh ruh ïa ka jingkren jong ki bad mynta la pynsah ïa ki ha ka jaka kaba shngaiñ katba ki kam ki dang sahteng ban pyndep.
