Shillong, Jylliew, 27: U Myntri ka tnat Jngohkai Pyrthei ka Sorkar Jylla u la pyntip ba ka Sorkar Jylla kaba la bei pisa ban pynlut T. 23.5 klur ha ka jingpynlong ïa ki tamasa bapher bapher ha u snem baladep ka la lah ban ïoh kamai pisa haduh T. 133.42 klur, kaba long hynriew shah na ka jingpynlut pisa.
Haba ïasam jingtip na ki jingpynlong ïa ki tamasa ba ladep pynlong, u Bah Paul u la ïathuh ba ka jingpoi jong ki briew ha ki tamasa ka long 3.86 lak ngut, 60,000 hajar ngut ki organic social post bad 20 million ki reel view.
Ha kaba ïadei bad ka jingïoh lum pisa kaba heh, u Myntri u la ong ba ka jingïoh khajna na kaba die ïa ki tiket ka long T. 29.1 klur, ka khajna na ki Hotel ka long T. 33.8 klur, sa kiwei kiwei ki kam ba kynthup ïa ka leit ka wan, ka jingsiew leit tda kaba kot T. 37.1 crore, na ka bam ka dih ka long T. 6.9 klur, bad ka jingpynlut ha ka tamasa ka long T. 18 klur.
U la ong ba ki jingpynlong ïa ki tamasa ki la lah ban plie ïa ki lad aikam aijam ha kaba 5509 hajar ngut ki briew ki la ïohkam ha ka jingpynlong ïa ki tamasa bapher bapher.
U Myntri u la ïathuh ba ki don briew na kylleng ka ri India bad nabar ri kiba ïashim bynta ha ki tamasa, bad 1762 ngut ki dei tang na ka jylla Maharashtra bad 224 ngut na Odisha, nalor kiwei kiwei ki jylla.
Shuh shuh u Bah Paul u la pyntip ba ka Shillong bad ka Sohra ki la ïohi ïa ka jingbun kiba wan kai kaba jan kot 27%. Ka jingïoh lum khajna na ka jingwan ki liengsuiñ ka long T. 16.80 klur, bad palat 18,000 hajar ngut ki nongjngohkai pyrthei ki la wan da ki liengsuiñ. Ka jingïoh kamai na ki kali kamai ka long T. 5.38 klur.
“Na ka bynta shi tyngka ba la pynlut ha ka tiket, sa T. 334 spah la pynlut ha kaba sah iingbasa, kaba leit jingleit, ka bai bam bad ka jingleit siew sha iew sha hat,” u la ong.
U Jason Derulo bad ka The Script kin sa pynlynguh ha kane ka tamasa, ha kaba ki nongpeitkai kin sa ïoh ïa ki Synchronized LED-wrist Band. Ha kajuh ka por u Myntri u la pyntip ruh ba ka Shillong Cherry Blossom Festival kan sa long ar sngi kynthih, kata ha ka 14 tarik bad 15 tarik, Naiwieng, 2025.
Haba jubab ïa ka jingkylli, u Myntri u la ong ba ka Meghalaya ka la long kaba hakhmat eh ban ïoh kamai na kaba pynlong ïa ki konsad, ka saiñ pyrkhat ba la wanrah da u Myntri Rangbahduh ka ri. Ka jingtrei shitom jong ka Sorkar ka la pynmih ïa u soh, kaba pynshisha ba ka ïoh ka kot na ki konsad kan dang ïai bteng ha kane ka Jylla Meghalaya ban pynïoh khajna ïa ka jylla.
Halor ka jingïoh synñia ki kam jngohkai pyrthei sha ka GDP jong ka Meghalaya, u Myntri u la ong ba ka kam jngohkai ka la long kaba tnat kaba lai kaba kyntiew ïa ka ïoh ka kot jong ka Meghalaya, kaba kiew bha na ki snem baladep hadien ka jingshna pynbha ïa ki iing basa ha kylleng ka jylla.
U Myntri u la pyntip ruh ba ka Sorkar meghalaya ka la jop ïa ki ar tylli ki khusnam Pan-Asian Awards na ka WOW Awards Asia, kaba long kawei na ki rynsan kaba ju ai jingithuh ïa ka jingpynlong ïa ki rynsan bad ki tamasa kiba heh ha ka dewbah Asia, ïa kaba la pynbeit da ka Event FAQs and KPMG.
U la ïathuh ba ka Shillong Cherry Blossom Festival 2024 ka la jop ïa ka Gold Award na ka bynta ka kyrdan ‘Special Event of the Year (Government)’ katba ka tamasa ‘Me·gong Festival’ ka la jop ïa ka khusnam ksiar ha ka kyrdan ‘Festival of the Year (Culture)’
