Shillong, Jylliew 27: Ka Jaiñtia Joint Action Committee Border Issue (JJACBI) ka la kyntu ïa u Symbud Myntri Rangbah ka jylla bad uba khmih ïa ka tnat ki Kam Pohïing u Bah Prestone Tynsong, da kaba kyrpad ban phah shong noh mardor da ki pulit Special Force-10 (SF10) hapoh ka shnong Lapangap.
Ka committee ka la ong ba kane ka jingsdang klang ka jingjia ïakajia pud ba la leh da ka Karbi Anglong Autonomous Council (KAAC) bad ki briew jong ka, ka la ktah ïa ki kam rep kam riang, khamtam ha kane ka por ba dang dei ka por thung por tep.
Ka la kynnoh ruh ba ki pulit ka Assam da kaba leh shilliang ki ai ka jingkyrshan ïa ki katto katne ki kynhun ka Karbi ha kaba kane ka la wanrah ka jingshongsyier hapdeng ki trai ri trai muluk kiba dei ki Pnar kiba sah ha Lapangap bad ki thaiñ sawdong jong ka.
Ka committee ka la ong ba da kaba buh ïa ki pulit SF10 ka long ban ïada na kino kino ki jingwan kyntur pud bad ban pynthut ïa ki kam rep kam riang, kan wanrah pat ïa ka jingsngew shngaiñ hapdeng ki nongrep bad ki longïing jong ki, ban kiar na ki jingjia ïaumsnam jaitbynriew, ban ai biang ka bor jingshaniah ïa ki paidbah da kaba ïaid ruh katkum ka aiñ bym leh shilliang da kiwei ki bor ba bat ïa ka aiñ.”
Ka committee ka la kyntu ïa ka sorkar ban shim ïa kane kum ka kam kaba kyrkieh bad ban phah ïa ki pulit SF10 manla ka por khamtam ha kane ka por ba dang dei ban thung bad kumjuh ruh ban kheit ïa ki marrep ka ban long ka jingïada ïa ki hok, ïa ki jingim bad ka ïoh ka kot ki briew ba sah ha shnong Lapangap.
