Shillong, Jylliew 27: Ka Hynñiewtrep Border Disputes Redressal Forum (HBDRF) ha ka sngi Thohdieng ki la kyrpad ïa ka jingtuklar jong u Myntri Rangbah u Conrad K Sangma ban shimkhia halor ka jingjia ïakajia pud ba dangshen hapdeng ka Meghalaya bad Assam ha ka shnong Lapangap kaba ha West Jaiñtia Hills District.
Katkum ka dorkhas ba ki la phah da ka Forum, la ong ba ka Karbi Anglong Autonomous Council ka la thung ïa ki dieng hapooh ka shnong Lapangap, Block-1, khlem da kynjoh ktien ïa ki nongialam ka shnong ha kaba ka la jia ha ka 10 tarik mynta u bnai, 2025. La ujor ruh sha ka ophis Deputy Commissioner, West Jaiñtia Hills District.
Ka la don ruh ka jingïalang kaba la long ha ka 19 tarik mynta u bnai, hapdeng DC/SP ka West Karbi Anglong bad ka West Jaiñtia Hills District ha IB Khanduli, ha kaba la rai ban pynneh ïa ka suk ka saiñ bad ban sangeh pynlong ïa ka prokram jingthung ïa ki dieng. Hynrei na ka liang ka Assam ka la pynkheiñ ïa kane ka jingïamynjur da kaba pynlong ïa ka jingthung ïa ki dieng khlem da kynjoh ktien ha ki nongïalam ka shnong.
Ha ka 25 tarik Jylliew, 2025, la pynlong ïa ka jingïalang bad ki nongshong shnong ka Lapangap, Sengbhalang bad ki bor District na baroh arliang.
La ïathuh ba ki nongshong shnong bad ki Sengbhalang ki la jynrat ïa ki dieng ba la thung da ka Assam khlem ka jingïoh jingbit. Ka jingïania ka la mih hapdeng ki Karbi bad ki Pnar kaba lam sha ka jingpyndonkam ïa ki kyntien kiba kham tyngeh, jingïasiat jri bad ka wang maw. Ki Pulit ka Assam ki la siat da ki tyndong lyer pynsat khmat, kaba lam sha ka jingmynsaw hapdeng ki paid Pnar.
La kynnoh ruh ba ki paid Karbi ki la pynjulor bad thang ïa ki lyngkha kba jong ki paid Pnar ha kane hi kajuh ka sngi. Ha ka 26 tarik Jylliew, 2025, ki Pulit ka Assam kila wan bun ngut bad kerkut ïa ka jaka bad pyrshang ruh ban shna ïa ka ktem.
Kumta ka HBDRF ka kyntu ïa ka Sorkar Jylla ban buh ïa bun ngut ki Pulit Special Force ha ka thaiñ na ka bynta ka jingshngaiñ bad ban khang ïa ki Pulit ka Assam ba kin shna ktem ha ka thaiñ.
Ka la kyntu ruh ïa baroh arngut ki Myntri Rangbah ka Assam bad Meghalaya ba kin leit ïuhkjat ha ka thaiñ ban pynthikna ïa ka jingshngaiñ bad ban wanrah ïa ka jingsuk.
Na ka liang ka Forum ka pynpaw ïa ka jingsngew sheptieng ba lada ailad ïa ki Pulit Assam ban shna ktem, kan buh ha ka jingma ïa ka jingim jong ki paidbah Pnar bad kan sa buh jingeh ruh ban weng pat ïa ki lashai hadien habud.
