Shillong, Jylliew 27: Ka sorkar jylla ka la thmu ban pynbha bad kyntiew ïa ka resort ha Mawmluh, ban pynpaw bad pyni ïa ka Meghalayan Age, ïa ka geological age jong ka pyrthei ba shong basah.
Katkum ka jingïathuh u Myntri ka tnat Jngohkai ka jylla u Bah Paul Lyngdoh, ïa kane ka project la dep ban ïohpdiang ïa ki jingmang pisa, bad ïa ki tender la dep ban aiti.
Haba bynrap, u Bah Lyngdoh u la pynbna ruh kumjuh ban thaw bad shna ruh ïa ka rain museum ha Mawsynram, ha kaba ki jingmang ki la dep ban don. Ka pisa ba la mang ban pynlut ïa ka projek ka long T. 35 klur.
“Ka kam ban pyntrei ïa ka rain museum la khmih lynti ba kan sdang hadien ka aïom slap ha kaba ki tender la dep tyrwa bad ban pynïaid,” u la bynrap.
Kine ki project ki pyni ïa ka jingangnud ka sorkar ban pynkylla ïa ka jingitynnad ka mariang ka Meghalaya sha ka kam kaba pynïoh mad ha ka jaka ban shu buh tang ha ki jingthoh, u Bah Lyngdoh u la ong da kaba bynrap ban kyntiew ïa kine ki project kan pynpaw ruh ïa ka jinglong ba kyrpang ka jylla bad ban kyntiew ruh ïa ka kam jngohkai ha ka jylla.
