Shillong, Jylliew 28: Ka Sur U Paidbah Bri Hynñiewtrep (KSUPBH) ka dap da ka jingsngew lyngngoh ban ïohsngew ïa ka jingkren jong u Myntri ka Sorkar Jylla uba long ruh u Nongaiktien jong ka Sorkar MDA-II u Bah Paul Lyngdoh halor ka Inner Line Permit (ILP) kaba dei ka mat jingdawa ym tang jong ki paidbah hynrei wat ka Iingdorbar Thawaiñ ka Jylla ruh ka ladep ban mynjur ïa ka Resolution ha u snem 2019.
“Ka jingong jong u Bah Paul ba ka ILP ka dei ka Colonial Rule ne ka aiñ kaba la rim ka bym ïahap shuh bad kane ka juk mynta ka buh ïa ka Sur U Paidbah Bri Hynñiewtrep ha ka jinglyngngoh ba kumno kum u nongïalam uba la pyrta mynshwa ban ïoh ILP, ba un kren da kine ki kyntien,” ong u nongaiktien jong ka KSUPBH u Bah Thomas Passah ha ka sngi Saitjaiñ.
“Ka ILP ka dei kawei na ki mat jingdawa jong ka kynhun kaba ka la ïeng ban dawa ïa ka ILP bad u Bah Paul ruh u dei uwei uba la buh ïa kane ka jingdawa hakhmat naduh ba la seng ïa ka Khun Hynñiewtrep National Awakening Movement (KHNAM) hynrei sngewsih mynta ba un ong ba ka dei ka aiñ nongwei bad kaba la rim,” la kynthoh u Bah Passah.
“Lada ka Sorkar Jylla ka don ïa kane ka jinglong kumno ka Sorkar India kan ai ïa ka ILP,” la buh jingkylli u nongaiktien jong ka KSUPBH ïa u nongaitktien jong ka Sorkar MDA-II.
“Ka Meghalaya Residents Safety & Security Act (MRSSA) ka dei ka aiñ ban buh rekod ïa ki nongshongwai ha kane ka Jylla, ka MRSSA ka dei ruh tang ka atiar ban pynkhuid ïa ki jaboh kiba la don lypa katba ka ILP ka dei ban khanglad ïa ki briew kiba wan da ka lynti kaba bakla bad ka dei ka jingkhang ban ym ailad ïa ki jaboh ban rung sha ka Jylla,” la pynpaw u Bah Passah.
U la ong ruh ba kiwei ki jylla kiba la don ïa ka ILP ki la lah ban ïada ïa ka snap riewlum ba paka jong ki, kumta ka Ka Sur u Paidbah Bri Hynñiewtrep ka kwah kumjuh namar ha Shillong la ima ïa ka jingwan buhai shnong kiba nabar bad kane kan wanrah jingma ïa ka pateng ban wan.
“Kumba ka paw mynta, ka dei sa tang ka ILP kaba lah ban ïada bad ka jingdawa ban ïoh ïa ka ILP kam dei ban ym shah shuh ïa ki briew ban rung sha kane ka ri hynrei ba kin wan lyngba ka Permit,” la bynrap u Bah Passah.
Ha kawei pat ka liang, u Nongaibuit jong ka Ka Sur U Paidbah Bri Hynñiewtrep Bah Rastingwell Thabah u la ong ba ka ladei ka por ban ym pynjynjar ïa ki paidbah bad u la buh jingkylli ruh ïa ki MLA kiba la mynjur ïa ka resolution ILP ha u snem 2019 ha Ïingdorbar Thawaiñ ba kumno mynta ka mih pynban da ka jingpynthame ban pynkylla ïa ka sha ka MRSSA.
Shuh shuh, u la buh jingkylli ïa ka UDP ba kumno ha ka por elekshon ka buh ïa ka ILP hakhmat eh katba mynta ka mih pat ka jingkren na u Myntri Sorkar jong ka bad ka UDP ka don aïu ban jubab mynta.
“U la kyntu ïa ka Sorkar MDA-II ba kam dei shuh ban ïalehkai ïa kane ka mat kaba la mynjur da ki 60 ngut ki MLA bad kaba sngewsih ka long, “ba ujuh u briew uba ong ngi donkam ILP mynta ynda la shong ha shuki u ong, ym donkam ILP shuh.”
