Shillong, Jylliew, 29: Ka kynhun Special Investigation Team (SIT) ha ka sngi u Blei ka la ïoh kurup ïa ki ksiar kiba dei jong ka Sonam bad u (L) Raja Raghuvanshi na ka iing kaba don ha Ratlam district, Madhya Pradesh.
Ïa ka SIT, la lamkhmat da u SI Anthony Khongsit bad u SI Karan Pachua, da ka jingsynran lang jong ki Pulit ka Alkapuri Police Station, la pyntip u Superintendent of Police ka East Khasi Hills Vivek Syiem ha u kyrwoh.
Ha ka jingkhynra, ka SIT ka la ïoh ban kurup ïa ki ksiar ki ksah jong ka Sonam bad u (L) Raja Raghuvanshi u nongkhaii na Indore uba la shah pynïap, na ka ïing jong u Shilom James kaba don Ratlam District, Madhya Pradesh, u la pyntip bad bynrap ba ka jingïoh kurup ïa kine ki tiar la ngeit ba kin long ki sakhi sabut kiba khlaiñ ha ka jingtohkit kaba dang ïaid shakhmat.
Ha ka 26 tarik Jylliew, ka Kashari ka la aibor ïa ki Pulit ban set 6 sngi ha Police Custody ïa u Shilom James bad ïa ki arngut kiwei pat ki briew ïa kiba la kem halor ka jingpynjot ïa ki sakhi sabut ba kongsan kiba don jingïadei bad ka jingshah pynïap jong u nongkhaii na Indore u Raja Raghuvanshi, ha Sohra.
U Shilome James u dei u tyrwa jaka uba aiwai ïa ka iing sha u Vishal Singh Chauhan, uwei na kiba la shah kynnoh kum uba donkti hakhmat eh ha ka jingjia.
Katba arngut kiwei pat kiba la shah kem ki long u Lokendra Singh Tomar, uba sah ha Gwalior, Madhya Pradesh bad uba dei u trai iing jong ka iingmala ha Dewas Naka ba ka Sonam Raghuvanshi, ka nongshah kynnoh ba donkti hakhmat eh ha ka kam pynïap briew, ka la sah katba dang ka riehtngen ha Indore, bad u Balia Ahirwar uba trei kum u Security Guard ban pahara ha ka Complex jong ka iing ba la long trai da u Shilome James.
Ïa u Tomar la kem ha ka taiew baladep halor ka jingpynjot bad ka jingbuhriiki ïa ki sakhi sabut ba kongsan.
Shwa kane, ka Special Investigation Team (SIT) ka la ïoh kurup ruh ïa kawei ka pistol shna hi, ar tylli ki magazine bad ar tylli ki kuli .32 na wah da ka jingïalam jong u Silome James. Nalor ka pistol, ki Pulit ki la ïoh kurup ruh ïa ka pisa T.50 hajar na ka kali i10 jong u James kaba don ïa u nombar MP09WG 2352. Ïa ka pisa la lap ha ka pla thep laptop jong u Raj, ïa kaba ladep thang ingkhong.
