Shillong, Jylliew, 29: Ki Khasi Pnar kiba sah ha ka shnong Lapangap, West Jaiñtia Hills District kaba don markhap bad West Karbi Anglong District, Assam ba la buhai shnong da ki jaidbynriew Karbi ki don mynta hapdeng ka khim khait namarba ki syier thot thot ïa ki Pulit Assam bad ïa ki Karbi ban leit rep sha ki hali bad ki pynthor hadien ka jingïakynad kaba la jia dang shen.
Kane ka jingsheptieng ki Khasi Pnar ka la buh jingeh bad ka la ktah haduh katta katta ka jingmut jingpyrkhat namarba ka la dei artat ka por thung ïa u kba.
U nongthoh khubor uba la leit ban jurip sha ka shnong Lapangap ha ka jingïakren bad u Waheh Shnong jong ka shnong Lapangap u Bah Deibormi Lyngdoh, u la pynpaw ïa ka jingsngewkhia hadien ba la jia jin ar sien kynthih ki jingpynmynsaw bad ki kam pyntriem ki Karbi pyrshah ïa ki paid Khasi Pnar.
U la pynkynmaw ruh ba ha u snem 2024, uwei u nongrep na ka shnong Lapangap u la duhnoh ïa ka jingim ha ka lyngkha rep na ka daw ka jingïakynad.
Ka jingïasngewkhia ka la nang jur biang naduh ka 10 tarik Jylliew 2025, ha kaba ka Karbi Anglong Autonomous Council (KAAC) ka la thung jubor ïa ki tynrai dieng ha u lum Umchyrngan, uba dang hap hapoh u pud u sam jong ka shnong Lapangap, watla kam shym la ïoh jingbit.
“Ha ka 25 tarik Jylliew, ka jingïashun ka la nangjur kat haduh ba ki Pulit Assam ki la siat da ki bom pynsat khmat ïa ki paidbah Khasi Pnar kiba la leit ban jynrat ïa ki tynrai dieng,” u la ong bad bynrap, “u lum Umchyrngan u dang dei u lum uba hap hapoh u pud u sam jong ka shnong Lapangap kaba hap hapoh ka Elaka Shiliang Myntang.”
Kane ka jingjia ka la pynlong ïa ki paidbah ban sheptieng bad sangeh noh na ka jingleit rep namar ka jingbym don ki bor Pulit ka Jylla Meghalaya ban ai jingpahara.
U Waheh Shnong u la kyntu ïa ka Sorkar ba kan shimkhia bad ban ïa pynbeit noh mardor ïa u pud u sam.
U la kdew ruh ba ka jingpynslem jong ka Sorkar bad ka jingheh tyngam tang na Secretariat ka la buh ha ka jingma ïa ki paidbah ka shnong Lapangap.
“La slem ngi la pynsngew, hynrei ka jingïarap ka dang duna. Ka Sorkar ka dei ban shimkhia hadien ba la jia biang ka jingïakynad. Ki Karbi barabor ki ju pynjulor ïa u kba, ki thang ïa ki lyngkha bad ki pynmynsaw ruh wat ïa ki nongrep,” u la ong.
