Shillong, Jylliew, 29: Ka rynsan ïakura kaba la tip kum ka Shillong Cage Fighting Championship kaba la long ha ka sngi Saitjaiñ Lariti Multipurpose Theatre, New Shillong ka la kut noh da ki 14 tylli ki jingïakhun da ki nongïakura kiba kynthup ïa ki shynrang bad ki kynthei.
Ka jingïakhun kaba kham kongsan ha kane ka rynsan ka dei ka jingïakhun hapdeng u Johnny Nongrum u rangkura ba pawkhmat jong ka jylla Meghalaya pyrshah ïa u Anurag Singh na ka jylla Uttarakhand. Ha ka jingïakhun kaba la khmih lynti bha, u Johnny u la lah ban pynliem lyndang ïa u Anurag ha ka jingïakhun ha ka kylla kaba ar.
Ha ka jingïakren bad ki lad pathai khubor hadien ka jingïakhun, u Johnny Nongrum u la ai khublei bad u la pynpaw ruh ïa ka jingsngewnguh ïa ki paidbah kiba la wan ai mynsiem ha kane ka sngi.
U Johnny u la ïathuh ba u don ka jingangnud ban plie ïa ka klob ai jinghikai ïa ki samla kiba don ïa ka sap ïa kura ha kane ka jylla bad ha kajuh ka por u la pynpaw ka jingsngewnguh ïa ki bahaiing hasem kiba ju ai jingkyrshan na ka por sha ka por, ïa ki paidbah bad khamtam eh ïa ka jingkyrkhu jong u Blei.
