Shillong, Jylliew, 30: Ka Deputy Commissioner bad Chairperson jong ka District Tourism Promotion Society (DTPS), East Khasi Hills District ka la bthah ïa ki nongjngohkai pyrthei kiba wankai nabar jylla kiba thmu leit ïaid kjat sha ki jaka jngohkai pyrthei bapher bapher ka jylla Meghalaya ki dei ban da ïalam lang ïa ki Tourist Guide na ka bynta ka jingshngaiñ jong ki ha ka leit ka wan.
Ka jingbthah jong ka Deputy Commissioner ka long ba ki nongjngohkai pyrthei kin lait na kino kino ki jingjia ba sngewsih namarba ki briew kiba nabar kim pat da tip bha ïa ka jinglong jingman jong ki jaka ha kane ka jylla.
Kum ban shu pynkynmaw dang ha ka 11 tarik, Ïaiong, mynta u snem, ïa ka met ba la pyut jong uwei u nongjngohkai pyrthei na ka ri Hungary u Zolt Puskas la lap najan ka shnong Ramdait kaba don ha shilynter ka lynti ïaid kjat ban leit sha ka shnong Nongriat hadien ar taiew ba la pyntip ba u la jah rngai katba u dang thmu ban leit jngoh ïa ka jingkieng jri ha Nongriat.
Ka Embassy jong ka Sorkar Hungaria ka la ujor halor kane ha ka 29 tarik, Lber bad mar mar ki Pulit ki la register ïa ka jingujor ha ka 2 tarik, Ïaiong, bad la sdang ruh ban wad da ka kynhun Search and Rescue Team, ki nongshong shnong bad ki kynhun bapher bapher.
Ki jingbuh jingthoh ki pynpaw ba u Pukas u la sah ha kawei ka Hotel ha nongbah Shillong ha ka 29 tarik, Lber bad u la mih ha ka por 9:00 baje mynstep da kawei ka local taxi ban leit sha ka shnong Sohra. U nongñiah taksi u la pynthikna ba u la pynhiar ïa u Pukas ha ka shnong Mawsahew bad nangne u la ïaid hi marwei da ka kjat ban leit sha Nongriat lyngba ka shnong Mawkawir, da kaba rah tang ïa kawei ka pla kieng khlem da ïalam satia ïa u Tourist Guide.
Katkum ki dak ki shin kiba paw hadien ba la lap ïa ka met, ki Pulit ki ngeit ba u Pukas u la syntuid bad hap ha khyndew, kaba pynlong ïa u ban duhei ïa ka jingim.
