Shillong, Naitung 01: U Nongaiktien ka sorkar MDA bad u Myntri ka sorkar jylla u Bah Paul Lyngdoh u la pynthikna ba ka jingïakajia pud bad ka Assam yn sa pynbeit ha shwa ban kut ka samoi treikam jong ka sorkar MDA.
Haba kren sha ki lad pathai khubor ha ka sngi baar, u Bah Lyngdoh u la ong ba ka sorkar ka la pynïaid shakhmat ban pynbeit ïa kane ka kam bad la khmih lynti ban soi ïa ka MoU ba bynrap ha ka 15 tarik u Nailar, ha kaba sa kumba 5 tylli ki shnong yn sa pynphai sha Meghalaya kaba long shi bynta na ka jingpyrkhat ka regional committee.
Katkum u Bah Lyngdoh, ka sorkar ka la pyrshang ban pynduna ïa ki jingïakajia ha madan bad ka la lah ban pynthikna ba ka suk ka saiñ kan don ha kata ka rukom ba la pynbeit.
Halor ka jingjia ba dang shen kaba la mih ha shnong Lapangap ka West Jaiñtia Hills, u Bah Lyngdoh u la ong ba ka kynhun ki 30 ngut ki pulit ba la ïalam da u SP ka West Jaiñtia Hills, la dep ban buh sha kane ka thaiñ ban pynthikna ki lad jingïada bad ka jingshngaiñ jong ki nongshong shnong.
Ka sorkar ka la buh ruh ïa ka jaka sah ki pulit ba shipor ha shnong Lapangap bad baroh arliang, ka Meghalaya bad Assam ki la buh ïa ki jaka sah pulit ba shipor ha kane ka thaiñ.
U Bah Lyngdoh u la ong ba shisien ba la lah ban pynbeit ïa ka kam khappud ha ka kyrdan ka regional committee, yn sa lah ban shim shuh shuh ïa kiwei pat ki sienjam.
“Ngi la buh ha shnong Lapangap khnang ba kan don ka jingsngew shngaiñ bad ban leh ban tehlakam ha kata ka rukom bad ngi la khmih bha ïa ki kam bad kyrmen ba kane ka jingeh yn sa lah ban pynbeit shisien ba ngi la don ka jingïasyllok ha ka regional committee level,” u la bynrap.
U la banjur da kaba ïathuh ba ka sorkar ka la shimkhia bha shaphang ka jingdonkam ki lad jingïada bad ka jingshong shngaiñ jong ki briew bad ka la pynbun ruh ka jingdon ki pulit ha kane ka thaiñ.
“U SP dalade u la khmih ïa kane ka kam, ha kaba kane ka pyni ïa ka jingangnud ka sorkar ban pynbeit noh ïa kane ka kam,” bynrap shuh shuh u Bah Lyngdoh.
