Shillong, Naitung 01: Ka Federation of Khasi Jaiñtia and Garo People (FKJGP) Central Body, hadien ba la ïoh jingtip shaphang ka jingshah shoh pynmynsaw jong uwei paradoh para snam ha ki jaitbynriew Karbi kiba don kumba 50 ngut eiei ha ka Shnong Lakaroi katba u dang wan shim dawai ñiangsohpet na ka shnong Lumlakhiat, kane ka jingjia ka la pynbitar lep ïa ka seng hi baroh kawei namar kum kitei ki jingjia ki la ju jia na ka por sha ka por kynthup ruh ïa ka jingshah lum khajna be-aiñ ha kylleng ki jaka khappud bad ruh ka jingshah pynjulor ïa ki jingthung-jingtep ha ki jaka rep.
Ka FKJGP ka la ong ba ka jingïoh lad ban shim kabu jong kitei ki jaitbynriew Karbi ka dei na ka daw ba ki ïoh ïa ki jingïada ba pura na ki pulit Assam katba ki pulit jong ka jylla Meghalaya pat ki shu long tang kum ki nong peitkai.
“Dang ha kine ki khyndiat taïew ba la dep ki Karbi ki la sdang ban kurup wat ïa ki jaka rep jong ki paid Khasi Pnar ha u Loom Pynthor kaba hab ha ka Shnong Lapangap da kaba wan sher dara bad wanrah ïa ki kor ki bor ban thang light ha kaba ki la thaw ruh ïa ki ïing ki sem jong ki bad byrngem-byrsit ruh ïa ki Nongshnong Shnong Lapangap ba kim dei ban wan ïuhkjat shuh ka katei ka jaka, ym tang katta katkum ki durkhih ba la ïoh da ka seng kitei ki jaitbynriew Karbi ki la pyndonkam ruh da ki kyntien khlem akor bad kyntien kheiñpoh ïa ki pulit jong ka jylla Meghalaya,” ong u Bah Khrawkupar Nongseij, Chief Organisng Secretary.
U la pynpaw ba ka FKJGP ka dap da ka jingsngewkhia ba ki bor sorkar jong ka jylla Meghalaya pat ki dang ïohthiah lyngngai wat haduh kane ka khyllipmat kaba mynta khlem da shim satia ïa kino kino ki sienjam da kaba aidaw bad pyrshang ban thet kti ha ka kyrteng jong kata ka ‘Kam ïa Pynbeit pud’ kaba dang ïaid shakhmat. Kaba la pyndukha mynsiem shuh shuh ïa ka seng ka long ba ka ka 27 tarik Jylliew katba ki nongïalam jong ki kynhun Sengbhalang bapher bapher na Ri Lum Jaiñtia bad ki Nongïalam jong ka Synjuk ki Waheh Chnong West Jaiñtia Hills ki dang pyrshang ban pynsngew ha u Symbud Myntri Rangbah jong ka Jylla ba ki donkam ïa ki ophisar la ka long ha ka District Administration ne ha ki bor Pulit kiba dei ki paradoh ki parasnam kiba sngewthuh ïa ka ktien ka thylliej, kiba sngewthuh shisha ïa ka khia ka shon jong ki paidbah, phewse u Symbud Myntri Rangbah uba khmih ruh ïa ki kam Pohïing jong ka sorkar Jylla um shym la ailad satia ban kren ïa kata ka bynta da kaba u ong: “Kane kadei ka kamram jong ka Sorkar, Phim lah satia ban ïakren hangne”.
“Ka jingkylli kaba mih mynta pat ka long ba kita ki bor ba dei khmih ïa ka aiñ kiba ka sorkar jylla ka la thung bad bujli da ki bym dei satia ki paradoh para snam hato ki la ai jingïada shisha ïa ki paid Khasi-Pnar ne ki shu long tang ki nongpeitkai namarba wat tang ïa ka ktien ka thylliej ruh kim sngewthuh satia, sa katno tam lei ïa ka jingkitkhlieh?” kylli ka seng.
Ka FKJGP ka pynrem jur ruh ïa ka jingkren jong u Myntri uba khmih ïa ki kam jngohkai pyrthei uba la kynnoh ba ki Sengbhalang kim dei ban pynlong pla kura (Punching Bag) ïa ka sorkar halor ka jingjia ha ka shnong Lapangap bad ki kam ïakajia Khappud.
“Ka jingkylli kaba mih mynta pat ka long ‘Hato ka jingshah thombor pat kiba ju jia na ka por sha ka por ïa ki paradoh ki parasnam jong ngi ha ki jaitbynriew Karbi bad ki bor pulit jong ka Assam, ka dei ba ka sorkar Meghalaya ka pynlong pla Kura (Punching Bag) ïa ki paidbah ba lui lui tang na ka daw ba ka sorkar jylla ka dang ïakren da ki phew tylli ki snem ïa kata ka kam ïa pynbeit pud bad ka jylla Assam? Ka Seng ka buh ka jingkylli ïa utei u Myntri ba sa katno tylli ki mynsiem ba kordor kum ka jaitbynriew ngin dang ïai duh bad sa katno kum ka jaitbynriew ngin dang ïai shah thombor jem rngiew ha ki jaitbynriew Karbi?”
“Ka seng ka la dep shong ïa ka jingïalang kaba kyrkieh ban ïa thir sani bha halor katei ka bynta jong ki jinglong jingman ha ka shnong Lapangap bad ruh jong kiwei pat ki jaka khappud kiba don hapdeng ki jingïakajia, kumta ka seng ka bthah ïa ki dkhot jong ka seng ba kin long kiba la khreh la ka long ha kano kano ka por ban mih madan, kam pher long katba long jia katba jia, lada kita ki bor jong ka Sorkar kim lah ban ai jingïada ïa ki paradoh parasnam, ki dkhot jong ka seng ki long kiba kloi ban shimti bad ha kata ka por ka sorkar kam dei satia ban kynnoh ba ki samla ki shim ïa ka aiñ ha la ka jong ka kti,” iathuh u Chief Organising Secretary.
Kyntang ïawai ka FKJGP ka phah ïa kane ka kyrwoh sha ka sorkar jylla ba kam dei satia ban shim sting ïa kane ka jingjia da kaba shu ‘Thied por ha ka kyrteng jong kata ka jingïa pynbeit pud’ hynrei kadei ban pyni da ki kam khnang ba ki paidbah nong shong shnong kiba shong sha ki jaka khappud kin ïoh ïa ka jingshong shngaiñ.
Ha kawei pat ka liang ka FKJGP ka kyntu jur ruh ïa baroh ki seng saiñpyrthei ba kin ïeng tylli kawei ban ai ka jingïada bad ka jingshngaiñ ïa ki trai ri trai muluk kiba shong basah ha ki jaka khappud da kaba klet noh shipor ïa ka jingkwah burom, jingsngew pher saiñ hima, hynrei ban saiñdur ïa ka jylla hi baroh kawei nangne shakhmat.
