Shillong, Naitung, 01: Haduh 407 na ki 457 ngut ki nongdie madan ba la ithuh kum ki nongdie madan bapura ha Khyndai Lad, katkum ka jingsorjamin da ka Provisional Town Vending Committee (PTVC).
Katkum u kyrwoh ba la pynmih da u Commissioner & Secretary ka tnat Pynroi Sor, ka jingsam ïa ki Certificates of Vending (CoVs) kan sdang naduh ka 2 tarik mynta u bnai bad ïa mynta, haduh 251 tylli ki CoV ladep ban ai sha ki nongdie madan ba la ïoh jingithuh.
Ka PTVC ka la pynmih ruh ïa ka jingpyntip paidbah kaba kyrpad ïa ki nongdie madan bym don ïa ka CoV ba kin mih noh na ki jaka ba ki la shong die jingdie hapoh lai sngi, bad ka jingpyntreikam ban pynkynriah ïa ki nongdie madan ba la ïoh ïa ka CoV kan treikam noh mardor naduh ka 22 tarik, Naitung, 2025.
Ïa ka jingpynbna la pyntip paidbah naduh ka 25 tarik haduh ka 28 tarik, Jylliew bad ka jingkyndang ïa ki bym don ïa ka CoV ka la sdang naduh ka 30 tarik Jylliew.
Ka tnat ka la pynpaw ba ka jingpyrkhing ïa ka jingdie madan ka long ka kam kaba jwar bad ka donkam ïa ka jingtreilang na ka Shillong Municipal Board, na ka ophis Deputy Commissioner bad na ka tnat Pulit.
Ka tnat ka la wanrah ruh ïa ka skhim ban ai Relocation Allowance kaba T. 20,000 sha ki nogndie madan kiba don ïa ka CoV ba pura, ïa kaba yn siew haduh T.10,000 bad manla u bnai yn siew mar T. 2,000 hajar ha ki san bnai ban sa wan.
Ka jingtreikam bad ka jingpynbeit ïa ki nongdie madan la peitngor ruh da ka Iingbishar, kumba la kdew ha ki Public Interest Litigations (PIL) kiba ïadei bad ki nongdie madan bad ka jingkhapngiah kali. La bynrap ba ka jingpyntreikam ka thmu ban ïada ïa ka jingim jong ki nongdie madan ha surok bad ban ailad ïa baroh ban ïaid laitluid ha surok.
Ka Provisional Town Vending Committee ka la leh ïa ka in-situ digital survey ïa ka jingdon jong ki nongdie madan kiba hap hapoh u pud u sam jong ka Municpal, katkum ki kyndon jong ka Scheme.
Ïa ka jingjurip la leh ha ki bynta bynta, kaba la sdang da ka jingjurip nyngkong ha Khyndailad ha ka 4 tarik, Nohprah, 2023 bad hadien kata ha kylleng ki 22 tylli kiwei pat ki jaka ïa kaba la pyndep ha ka 16 tarik, Kyllalyngkot, 2024.
Ki don baroh 1,400 ngut ki nongdie madan ba ladep sorjamin, ha kaba 760 ngut la shem ba ki dei ki nongdie madan bapura. Ka thaiñ Khyndailad la jied ban pyntreikam ha ka wat banyngkong.
La thaw ïa ka Sub-committee ban pynlong ïa ka jingbishar, kaba la long ha ka 28 tarik, Rymphang, 3 tarik bad 4 tarik Lber, 2025. Ki don haduh 87 tylli ki jingkam ba la ïoh pdiang, ha kaba 62 tylli ladep ban pynshisha bad 25 ngut ki nongdie madan ki la pep.
Nalor kata la ailad ban bishar na ka bynta ki nongdie madan ba pep ha ka 25 tarik, Ïaiong, 2025, ba lah pyndep lut ha ka 8 tarik Jymmang, 2025.
Kane ka la long ka sienjam ba kongsan tam ha kaba pyntreikam ïa ka skhim bad ka jingpyrkhing ïa ka jingdie madan hapoh u pud u sam jong ka Municipal.
