Shillong, Naitung, 01: U nongaiktien jong ka sorkar MDA bad Myntri ka Sorkar u Bah Paul Lyngdoh u la takraiñ tyngeh ïa ki nongïalam jong ka seng ki nongdie madan ba la tip kum ka Meghalaya and Greater Shillong Progressive Hawkers and Street Vendors Association (MGSPHSVA) da kaba kynnoh ba ki don ïa ka jingthmu barieh shalyndet ban pynslem ïa ka jingpynkynriah ïa ki nongdie madan sha ka mala ba la shalor jong ka Parking Lot ka MUDA, ïa kaba la pynbna kum ka Vending Zone.
U Bah Paul u la pynmih ïa kane ka jingkynthoh haba jubab ïa ka jingïakhih jong ka MGSPHSVA kaba la kynnoh ba ka jingkyndang ïa ki nongdie madan na Khyndai Lad ka dei kaba shu leh beaiñ.
“Namarkata, i kumba ki don kiwei pat ki jingthmu barieh da ki katto katne ki nongïalam. Ngan ym kynnoh lut ïa baroh ki nongdie madan hynrei kumba ka paw ki katto katne ngut ki nongïalam kin ym kwah ban ïa pynbeit ïa kane ka kam. Hynrei sa shisien, ngan pynkynmaw biang hangne ba ka Sorkar ka la kut jingmut ban pynthikna ïa ka jingshongsuk shongsaiñ,” la ong u Bah Paul ha ka jingïakren bad ki lad pathai khubor.
U la maham ba ka Sorkar kan ym ailad daleilei ruh ba ka shongsuk shongsaiñ kan shah pynthud, da kaba ong ba ka jingtur ki nongïalam ka seng ki nongdie madan hakhmat Secretariat, kaba u la kam ba ka dei ka jingpynkheiñ ïa ka Section 163 jogn ka BNS.
U Bah Paul u la ong ba ka Sorkar ka la pynjem da kaba pynjlan ïa ka jingaipor khatduh ban pynkynriah ïa ki nongdie madan haduh ka 22 tarik mynta u bnai bad nalor kata la tyrwa ruh ban siew jingïarap pisa ïa ki nongdie madan kiba mynjur ban leit shong die jingdie ha ki jaka ba ka Sorkar ka ladep pynshna.
“Ka sorkar ka la mang pisa ban ai jingïarap mar T. 10,000 mar uwei pa uwei nongdie madan kum ka Shifting Allowance bad ïa kaba yn siew jingïarap manla u bnai T. 2000 uwei uwei u nongdie madan na ka bynta san bnai kum ka jingïarap lem ïa ki na ka daw ba la pynkynriah sha ki jaka shongdie madan ba thymmai.”
U Bah Paul u la ong ba ka Sorkar ka la leh da ka lynti kaba dei bad ka la shimkhia ryngkat ka jingkitkhlieh ban pynduna ïa ka jingkhapngiah ha nongbah Shillong bad ban pynkylluid ïa ki katto katne ki lynti ïaid kjat.
U la pynkynmaw ruh ïa ka hok ba ïaryngkat na ka bynta baroh kiba pyndonkam ïa ka surok, naduh ki nongniah kali, ki nongïaid lynti, ki nongdie madan bad ïaiban ba ka Sorkar kan ym pynduh satia ïa ka hok jongno jongno ruh na ka bynta ban pynmyntoi ïano ïano.
“Ngan ïai ong biang ba baroh ki nongpyndonkam ïa ka surok ki don ïa kajuh ka hok bad ka hok jong nga kum u nongdie madan kam mut ba ngan pynduh noh ïa ka hok jong kiwei pat kiba pyndonkam ïa ka lynti ïaid. Ngi don ïa ki nongniah kali, kiba pyndonkam ruh ïa ka surok. Ngi don ïa ki nongïaid lynti, kiba pyndonkam ruh ïa ka surok. Ngim lah ban pynduh ïa ka hok ban pyndonkam ïa kajuh ka jaka tang na ka bynta ban pynmyntoi ïa kiwei pat kiba pyndonkam ïa ka surok,” u la ong.
U Myntri u la pyntip ba ka jingïathir ïatai ka la shimpor jin haduh shi snem ha kaba ïadei bad ka Town Vending Committee bad ha ki jingïalang la buh jingthoh baroh ki jingïakren bad baroh ki kynhun ki la ai ka jingmynjur ïa ki kyndon ba la buh.
“Kane kam dei kaei kaei kaba ka Sorkar ka la leh tang ha ka shikhyllipmat. Ngi la ïakynduh ïa baroh ki nongdie bad wat ki nongïalam ba hakhlieh duh jong ki ruh ki la ïashim bynta ha ki jingïalang bapher bapher ba la pynlong na ka por sha ka por,” u la ong bad bynrap, “ïa ki jingïalang la buh jingthoh bniah bad ki la mynjur ïa ki kyndon bad ki jingpynbeit.”
Halor ka jingkyndang ïa ki nongdie madan, u Bah Paul u la ong ba ka long kaba sngewsih bad nalor kata ki ophisar ki la pynpaw da kaba shai ba tang kito kiba don ïa ka Certificates of Vending (CoV) yn shah ban dang bteng ïa ka kam die jingdie.
