Shillong, Naitung, 02: U Symbud Myntri Rangbah ka Jylla uba khhmih ïa ka tnat Kam Pohiing Bah Prestone Tynsong ha ka sngi Balang u la ong ba ka Sorkar Jylla kan ïada ïa ki nongshong shnong kiba shah byrngem ha kino kino ki kynhun.
U Symbud Myntri Rangbah u la pynpaw ïa kane haba kylli halor ka jingshah byrngem jong u trai ka Economic Pharmacy ha ka seng kieng atiar Hynñiewtrep National Liberation Council (HNLC) ba la shah kheiñ beaiñ ha ka sngi Baar.
“Ym don mano mano ruh ba lah ban shim ïa ka aiñ ha ka kti lajong, ai ba ka aiñ kan ieng, la ka dei ka HNLC ne kino kino kiba shu pynmih ïa kata ka jait jingbyrngem, ka Sorkar ka don ban ïada ïa ki”, u la ong haba bynrap ba ki bor ba dei peit ki long kiba peitngor bha ïa kum kine ki jingbyrngem.
Ha kawei pat ka liang u Bah Tynsong u la ong ba ka Sorkar ka long kaba kloi ban ïakren bad ka Hynniewtrep National Liberation Council (HNLC)
“Ka jingkhang ka plie beit na ka liang jong ngi. Ka shong ha ki (HNLC). Ka shong ha ki ban rai. Lada ki kwah, ki lah ban phah ktien sha ngi, ngi long kiba kloi,” u la ong.
Kane ka jingkren jong u Symbud Myntri Rangbah ka long hadien ba arngut ki dkhot ka HNLC ki la wan pyndem noh ïalade hakhmat ki Pulit.
U Bah Tynsong ïaroh ïa ka jingshimrai jong kine ki arngut ban wan pyndep hadien ba ki la sngewthuh ba ka lawei jong ki ban don hapoh ka seng kam poi shaei shaei ruh.
U la kyrpad ïa kiwei kiwei ki dkhot ka HNLC ba kin bud ïa kane ka nuska, da kaba pyntip ruh ba ki don ki jingïarap lada ki wan phai biang sha ka imlang ka sahlang.
