Shillong, Naitung 04: Ka North Eastern Council (NEC) ka la pyllait ïa ka pisa baroh kaba long T. 9,14,55,500 na ka bynta u bnai Jylliew ban pyntreikam ïa 7 tylli ki project ha Meghalaya.
Na katei ka pisa kumba T. 3,21,18,750 la pyllait na ka bynta ba tei ïa ka RCC G+4 Commercial Building ha Ïewdak Laban Municipal Market Shillong na ka bynta ban die ïa ki marrep, ki Horticulture, ki tiar shna da ki kti, ki sniang, ki syntiew bad kiwei, bad T. 1,02,89,000 na ka bynta ka jingtei ki kam jngohkai ha Laitlyngkot (Lumlyer) ha East Khasi Hills District, katba T. 1,24,52,000 la buh ka thong ban kyntiew ïa ki jaka ba la shah ieh, nangta ki jaka ba la shah ieh ha ka imlang sahlang na ka bynta ka jingkyntiew ha ka pule puthi da kaba kyntiew kyrdan ïa ka RK Missions School ha Meghalaya (RKM School, Umploh & Mawkynrew), nangta T. 1,47,37,000 na ka bynta ka RKM School, Jalapet bad Laityngkot, T. 1,07,64,000 na ka bynta ka RKM School, Laitlyndop bad Mylliem, T. 73,04,000 ïa ka RKM School Mawsmai bad T. 37,90,750 na ka bynta ka jingtei ïa ki jaka ban pynneh ïa ka kolshor ïa ki 6 tylli ki Sein Raj ha East bad West Jaiñtia Hills District.
Shuh shuh ka North Eastern Council ka la pyllait ruh ka pisa kaba T. 8,88,00,000 hapoh ka NESIDS (roads) kaba dei ka surok Pynursla-Latangriwan-Mawlynnong.
“Kine ki jingbei pisa ba la pyllait ki dei ban kyrshan ïa kiba bun ki bynta, kynthup ïa ki surok, ki jingtei ki kam jngohkai, ki jingtei ban pynneh ki kolshor, bad ban kyntiew ïa ki thaiñ ba la shah ieh beiñ,” ong ka kyrwoh na ka NEC.
“Ka NEC ka iaineh skhem bad angnud ban pynlait biang por ïa ka pisa ban pynthikna ïa ki jinglah ban pyntyllun ïa ki kam bad ka jinglah ban pyndep ïa ki projek ha ka por ba biang ha jylla Meghalaya,” ka la bynrap.
