Shillong, Naitung, 04: U Myntri ka Sorkar Jylla uba khmih ïa ka tnat Animal Husbandry & Veterinary u Bah AL Hek ha ka sngi Thohdieng u la pyntip ba ka jingshna ïa ki ar tylli ki khyrdop talasi ïa ki mrad bamdoh ha Ri Bhoi bad ha Garo Hills yn sa pyndep noh shen khnang ban weng ïa ka jingeh kaba ïadei bad ka koit ka khiah jong ki mrad bamdoh ba la wanrah na shabar ka jylla.
“Ki Check-post kin peit bniah ïa ka jinglong jingman jong ka koit ka khiah jong ki mrad, la ki long ne em kiba bit ban bam,” ong u Bah Hek haba ïakren bad ki lad pathai khubor bad pynpaw ba ka Standard Operating Procedure (SOP) ka la don lypa.
Kane ka jingkren jong u ka long hadien ba ka HYC ka la ujor sha ka Director ka AH& Vety ban dawa ba dei ban leh da kaba tyngeh ïa ka jingshalan beaiñ ïa ki mrad bamdoh sha kane ka jylla.
U Bah Hek u la pynthikna ba yn nym shah ban kit be-aiñ bad baroh ki mrad bamdoh kiba wanrah na kiwei pat ki bynta jong ka ri kin hap ban ïaid lyngba ka jingpeit bniah ïa ka koit ka khiah kaba biang bha da kaba pyni ruh ïa ki kot ki sla kiba biang.
U Myntri u la pyntip ruh ba ïa ka jingpynbna ha kaba ïadei bad kane ladep ban pynmih da ka Sorkar bad la bthah ïa ki Deputy Commissioner jong ki distrik bapher bapher ba kin shimkhia ïa ki kam be-aiñ kiba ïadei bad ka jingshalan ïa ki mrad bamdoh.
