Shillong, Naitung, 05: Ki shipai Border Security Force (BSF) kiba ap pahara ha khappud ka Meghalaya ki la ïoh ïa ka jingshah hikai ba kyrpang kumno ban ïada na ka jingshah thombor ha ki mrad khlaw, kab long sa kum kawei pat ka sienjam kaba kin hap ban ïatakhuh ha khappud.
Lai phew lai ngut ki ophisar na ka kynhun shipai BSF jong ka 193rd Battalion ha Gumaghat Border Outpost, Ranikor ki la ïashim bynta ha kane ka prokram ba la pynlong da ka tnad Forest ka Sorkar Meghalaya, kaba phaikhmat kumno ban ïada na ka jingshah thombor ha ka kynhun ki Hati khlaw kiba ju ïaid lynti na u pud u sam ka South-West Khasi Hills district.
Ki shipai BSF ki ju ïakynduh manla ka por ïa ki hati katba ki dang pahara ha khappud. Kane ka la pynmih ïa ki jingeh kiba buh jingma ïa ki briew bad ki mrad khlaw. Kine ki jingïaid lynti jong ki hati ki ju jia manla ka por ha kaba ki ju ïatakhuh bad ki jingker ha shilynter ka khappud.
U Dr Bibhuti Prasad Lahkar bad u Abhijit Baruah na ka Aaranyak’s Elephant Research and Conservation Division ki la ai ïa ki jingkren kiba bniah halor ka jinglong jong ki Hati ha dewbah Asia bad ki buit ban kiar na ki jingïaleh. Ha ka jingïalang la pynsngewthuh ïa ki shipai BSF ba kin tip bad ban sngewthuh ïa ki dak jingmaham kiba lah ban wan na ka jingïaid lynti jong ki Hati.
U Dr. Jimmy Borah, uba long u heh ophisar na ka Aaranyak’s Legal and Advocacy Division, u la ïathuh shaphang ka jingkynrei ka jingkhaii tuh bad ka jingïakynduh jingeh jong ki bor ba dei peit khamtam ha ki jaka khapppud. U la bati bniah ruh ïa ka jingkhaii beaiñ ïa ki Hati lyngba ki khappud bad u la ai jingtip ruh ïa ki buit ban ïakhun pyrshah na ka bynta ki shipai BSF ba kin dup lah ban ïathuh bad ban pyntip mar mar lada ki don ka jingsuba ïa kino kino ki kam beaiñ ha khappud.
Ka jinghikai ka pyni ïa ka rukom ïatreilang hapdeng ki bor pahara bad ki tnad ïada khlaw. U Bah Sankupar Kharsyntiew, uba dei u ophisar jong ka tnad Forest ka Nongstoin Wildlife Range, u la pyntip ïa ki jingthmu na ka bynta ki jingpahara lang bad ki buit treikam ban ïatreilang na ka bynta ban ïada na ka jingshah thombor hapdeng briew ha ki hati.
U Inspector Shravan Kumar jong ka 193rd BSF Battalion u la pynïaid ïa kane ka jingïalang katba u Bah Joseph Sawkmie uba dei u Beat Officer jong ka Mawkyrwat Wildlife Beat u la pynbeit ïa ki jingdonkam jong kane ka prokram.
