Shillong, Naitung 06: U MDC ka BJP na Tura Bernard N Marak u la thoh sha ki bank, petrol pump, bad ki mobile company ha Tura, West Garo Hills, haba ïadei bad ka jingai ïa ki laisen Trading by Non-Tribal (TNT).
U la pynpaw ka jingsngewkhia haba ïadei bad ka jingpynïaid ïa ki kam khaïi (businesses) khlem da ïoh ka bor kaba dei da kaba kdew ruh ïa ki kyndon ka riti synshar ka ri kiba don hapoh ki Sixth Schedule.
Katkum ka jingong jong u, ki bar jylla kiba pynïaid ïa ki kam khaïi ha ka thaiñ Tura (GHADC area) ki dei ban ïoh ki laisen TNT da ka jingmynjur na u MDC ka thaiñ.
U Marak u la ong ba u dang pyrkhat ban khot da ka jingïalang bad ki manager jong ki bank, petrol pump, bad ki mobile company ban pynshai bad ban shim ki sienjam ba donkam haba ïadei bad ka jingdonkam ba kin shim ïa ka laisen TNT.
U MDC u la kyrpad ruh ba kine ki bar jylla kiba pynïaid ïa ki kam khaïi ki dei ban ai ki jingtip ba bniah la ki la aplai ne ki don ne em ïa ki laisen TNT kiba dang im ba la mynjur da ma u, da ka jingkhmih lynti ba un ïoh ka jubab hapoh ka shi taïew lyngba ka email ([email protected]).
Kane ka jingleh ka long ruh ban bud ïa ki jingpynïapher la u Executive Member for Taxation, kam u Marak, u la ai ne em ka jingmynjur ïa ki laisen TNT, da kaba kyntait ban ong ba kim pat don ki jingai jingmynjur ba la leh lyngba ka ophis treikam jong u.
“Haba jubab ïa kaba u Executive Member for Taxation uba la pyntip hapoh ka ïing ba kum kine ki laisen la dep ban ai jingmynjur da u MDC ka Tura, kane kam dei kaba shisha. Ha kawei ka liang nga kwah ban pynshai ba kam shym la don kano kano ka jingmynjur kaba la wan na ka ophis jong nga kumta nga kwah ban khot ka jingïalang bad baroh ki Manager ki Bank, Petrol Pump bad ki Mobile Company kiba pynïaid kam hapoh ka Tura Constituency jong nga ba kin pynshai bad ban shim ïa ki sienjam kiba donkam,” ïathuh u Marak.
“Kane ka jingpynïapher ka wan ha ka jingmut jong nga ba bun na ki jaka khaïi mynta ki la pynïaid ïa ki kam khlem ka jingïoh bor kaba dei katkum ka aiñ, ha kaba kane ka pyni ïa ka jingpynkheiñ ïa ki kyndon ka riti synshar ka ri kiba don hapoh ka Sixth Schedule. Kumba ju leh manla ka por uno uno u bar jylla ne ki non-tribal agency ne company kiba thmu ban pynïaid ïa ki kam khaïi ha kane ka thaiñ ki dei ban ïoh ka laisen TNT da ka jingïoh jingmynjur na u MDC ka thaiñ. Ban shai halor kane, nga kwah ban kyrpad ïa phi ban ai ki jingtip ba bniah la phi la aplai laisen ne ba phi don ki laisen TNT kiba dang treikam kiba la ai jingmynjur da nga?” u la buh jingkylli.
U MDC u la pynpaw ruh ba kane ka jingïoh jingtip ka long kaba donkam ban peit ïa ki jingbym ïaid beit ki kam bad kumjuh ruh ban sdang shim ïa ki sienjam ban pynbeit ïa kine ki kam kaba long katkum ki kyndon jong ka aiñ.
