Leh be-ijot u Panah ïa ka khunruit kaba dang 15 snem, ujor ejahar ka kmie

Shillong, Naitung, 07: Uwei u panah uba u la ïap ka jingïatip lem u la thombor bad leh be-ijot ïa ka khunruit kaba la 15 snem ka rta ha kawei ka shnong kaba hap ha East Khasi Hills District.

Ka Kmie jong kane ka khynnah ha ka jingïakren bad ki lad pathai khubor ha phyllaw ka Ganesh Das Hospital, Shillong ha ka Lah Sngi u Blei ka la ong, “nga la kylli ïa ka tangba ka ong em ym don eiei.  Haduh ba ki briew ki la i pher ïa ka jinglong jong ka, ngi la hap ban leit leh test.”

“Hynrei ynda la leh test ngi shem ba ka long kumta (lah armet) ka sa ïathuh ba dei uta u panah,” la ïathuh ka Kmie.

Haba kylli, ka la ïathuh ba ka khun ka la armet la hynriew bnai kynthih.  “Kam nud satia ban ïathuh namarba u (panah) la byrngem ïa ka,” la ïathuh shuh shuh ka kmie.

“Ngi la kylli, namarba nga la ipher ïa ka jinglong jong ka. Hynrei ka ong beit ba kam leilei,” ka la ong bad bynrap, “namar ba kam i khlaiñ nga la ïalam sha Sub Centre bad ynda la leh test ki Nurse ki lap ba ka la armet. Nangta ka shu wan kdup ïa nga, ka sa phla. Nga ong na kaei ka daw khun ba phim ïathuh ïa nga kmie, ka ong ba u (panah) la byrngem ïa ka, ngam nud shuh ban ïathuh.”

Ka la ïathuh ba wat hadien ba ladep ujor ejahar pyrshah ïa u panah uba la thombor ïa  ka khun kynthei hynrei ki Pulit kim pat kem satia haduh mynta.

“Kum nga ka kmie, nga kwah ba ki bor ka aiñ ba kin pynsajia katkum ki kyndon ïa kum kine ki jait briew kiba shu wan dusmon ïa (ka khun) kaba dang long kum ka khyllung, ym lah ban ong ba ka la samla, namarba ka dang khynnah, ka dang 15 snem bad nga kwah ïa ki (Pulit) ba kin kem beit,” la ïathuh ka kmie jong ka lanot.