Shillong, Naitung, 08: Ki Pulit ka East Khasi Hills ki la ïohkem ïa u panah ïa uba la kynnnoh ba u donkti ban leh be-ijot ïa ka khunruit kaba la armet mynta la hynriew bnai kynthih.
Ha ka jingïakren bad ki lad pathai khubor ha ka sngi Baar, u Superintendent of Police (City) East Khasi Hills District Bah Herbert Pynïaid Kharkongor u la ïathuh ba ki Pulit kiba la pynlong ka jingthwet kaba jur ki la ïohkem ïa u panah na kawei ka shnong na ka shnong Syad, Umsning, Ribhoi District.
“Halor kane ka jingjia, la register case ïa ka ejahar ha Mawlai Police Station hapoh ka Section (j)(ii)(l)(n)(p)/6 jong ka POCSO Act pule lang bad ka Section 351(2)BNS,2023,” la ïathuh u SP (City).
U la ïathuh ba u panah u la leh be-ijot ïa ka khunruit la bunsien.
“Tang shu ïoh pdiang ïa ka ejahar ngi la pynlong ïa ka jingtohkit. U Investigating Officer ka thanat u la tohkit ïa ka kmie jong ka lanot kaba la ïathuh bniah shaphang jong u panah. Ngi la wan nyngkong sha Umrynjah, hynrei ngim lap. Hadien kata, la ïathuh ba u sah sha Rangskhen. U Investigating Officer bad u Officer incharge ka Mawlai PS bad u Officer incharge ka Mawngap OP ki la leit wad hynrei kim lap. La buh ruh ïa ki nongsyntait bad hynnin ka Lah Sngi u Blei ngi la ïohbat ïa u nongleh kam bymman na Ribhoi District. Kane ka dei lyngba ka jingtrei shitom jong ki Pulit ka Mawlai PS, ka Umsning PS bad ka Special Cell ka East Khasi Hills,” la ïathuh shuh shuh u SP (City).
“Mynta ka jingtohkit ka la ïaid shakhmat bad ngin sa rah ban tian bishar ïa u ha Kashari,” u la ong.
Halor ka jingkynnoh jong ka kmie ka lanot ba ki Pulit kim shym la kem ïa u panah wat hadien ba ladep ban ujor ïa ka ejahar, u SP (City) ula pynshai, “ka jingwad ïa u (panah) kam dei tang ha kawei ka jaka. Ngi la ïoh jingtip ba u don sha kawei ka jaka hynrei ynda la leit wad namarba ngi ïoh jingtip ba u dei u trai shnong ka Rangskhen ngi la leit wad hynrei ngim lap bad ngi la lap ïa u hynnin ka miet ngi lap ïa u sha Ribhoi District.”
Haba kylli, u ong, ‘ka jingphla jong ka lanot ka dei ka sakhi kaba khlaiñ bha. Ïa ine i khynnah ngin sa phah sha Kashari ban rekod ïa ka jingkren jong i. Ngin sa phah ruh sha ka Forensic Science Laboratory (FSL) ban tohkit,” u la ong.
