Shillong, Naitung, 08: U Special Officer ba la thung da ka Ïingbishar Meghalaya High Court ban khmih ha kaba ïadei bad ka jingpyntreikam ïa ki hukum jong ka Ïingbishar sha ki nongdie madan un sa lum da ka jingïalang bad ki bor synshar, ki Pulit bad ki nongmihkmat na ka seng ki nongdie madan ha ka 16 tarik, mynta u bnai.
Ïa kane la pyntip da u Chief Executive Officer (CEO) jong ka Shillong Municipal Board (SMB) u PK Boro ha ka jingpynbna ba la pynmih ha ka sngi Baar.
Ka jingthmu ban pynlong ïa ka jingïalang ka long katkum ka hukum ba la pynmih da ka Ïingbishar Meghalaya High Court ha ka 3 tarik, Naitung, kaba la thung ïa u Special Officer ban pynthikna ba ki hukum jong ka ïingbishar yn pyntreikam khlem kano kano ka jingpynkheiñ ïa ka shongsuk shongsaiñ ne ka jingleh ïa kano kano ka kam runar, da kaba ïamir jingmut bad u General Secretary jong ka seng ki nongdie madna, ki bor synshar bad ki bor Pulit, ong u Boro.
Ha ka 3 tarik, Naitung, ka Ïingbishar Meghalaya High Court ka la tuklar ïa ka jingpynkynriah ïa ki nongdie madan ha Khyndailad kaba dang ïaid shakhmat, da kaba bthah ïa ki bor synshar bad ki bor Pulit ba kin bud ryntih ïa ka aiñ. Ka seng ki nongdie madan ka la thep da ka aplikeshon da kaba kynnoh ba la pynkynriah jubor khlem da ai jaka bujli ban die shawei pat.
La thung ïa u Senior Advocate Subhasis Chakrawarty kum u Special Officer ban khmih ba dei ban pyntreikam pura ïa ki hukum jong ka ïingbishar.
Ka ïingbishar ka la bthah ïa u Special Officer ban pynkhreh ïa ka thup kyrteng jong ki nongdie madan ba la ïoh bor bad ba la ïoh laisen, kiba don kumba 349 ngut, da kaba ïasyllok lang bad ka seng ki nongdie madan bad ki bor synshar.
Ka Ïingbishar ka la bthah ruh ba ïa ki nongdie madan ba la ïoh laisen yn shah ban shong die jingdie ha ka thaiñ Police Bazar tang khyndiat kynta(12:30 baje mynsngi haduh 2 baje noh sngi bad 7:30 mynmiet haduh 9 baje mynmiet), kata da ka jingmynjur ba kim dei ban shong tam na ka por ba la buh bad ban pynwit ïa ka leit ka wan ki kali bad ki paidbah nongleit nongwan. Yn ym shah ïa ki nongdie madan bym pat ïoh laisen ban shong die jingdie ha kane ka jaka.
“U Special Officer ryngkat u General Secretary ka Association, ki bor synshar bad ki bor Pulit kin peit ba ki nongdie madan ki bym don laisen kim dei ban die ïa kino kino ki jait mar ha katei ka jaka ba la kdew haneng. Lada don ka jingpynkheiñ, u Special Officer ryngkat bad ki bor synshar bad ki bor Pulit kim dei ban shah ïa uno uno u nongdie madan ban die mar ha katei ka jaka,” la ong ka ïingbishar bad bynrap, “u General Secretary jong ka Association ruh u dei u shimkhia ha kane ka Kashari bad un pynthikna ïa kata bad ïa ki jaka shong die madan ba la pynbiang da ki bor synshar sha kino kino ki nongdie madan, dei ban pynkynriah noh mardor. Lada um leh kumta un shah beh noh na ka jaka shong die jingdie.”
Ka ïingbishar ka la bthah shuh shuh ba ki nongdie madan ba ki dei ban kynriah noh mardor sha ki jaka ba la pynbiang da ki bor synshar bad kiwei kiwei ki nongdie madan ki lah ban aplai ïa ka laisen kaba biang.
U Special Officer un pynthikna ba dei ban pyntreikam suk ïa ki hukum jong ka ïingbishar bad ban phah ïa ka kaiphod shwa ka 5 tarik, Nailar, 2025.
