Shillong, Naitung, 08: Ar tylli ki kali Auto-rickshaw ki la ingkhong ha kaba la suba ki don ki runar ki bym lah ban ithuh durkhmat ki la wiangding ïa kine ki ar tylli ki kali ha ka shnong Mawtnum kaba hap hapoh ka Nongpoh Police Station ha ka por kumba 2:00 baje haduh 2:30 baje mynstep sngi Baar.
Kine ki ar tylli ki kali auto Rickshaw ba la pynieng ha kajuh ka jaka ki kynthup ïa kawei kaba don ïa u registration number ML10 D 0651, kaba la long trai da u Bah Robertson Marwein kaba la ingkhong bad kawei pat ka dei kaba don ïa u registration number ML10 D 3492, ba la long trai da u Bah Xavier Thabah, kaba la julor na ka daw ka jingklang jong ki thylliej ding barhem.
Halor kane ka jingjia, ki Pulit kiba la poi sha kane ka jaka ki la pynlong ïa ka jingtohkit bad mynta ki dang pynlong ïa ka jingtohkit kaba bniah ban lap ksai ïa kiba donkti.
