Shillong, Naitung, 11: Ki paidbah nongshong shnong khappud jong ka jylla Meghalaya bad Assam kiba kynthup naduh ki Khasi, Garo, Rabha bad ki Assamese ha ka sngi Thohdieng ki la poi haduh ar bos ha phyllaw ka ophis u Deputy Commissioner na ka bynta ban wan ïakynduh ïa u Deputy Commissioner jong ka West Khasi Hills District u Bah Garod LSN Dykes.
Ïa ki paidbah jong ki 33 tylli ki shnong ka thain Kyrshai Ukiam lem bad ïa ki 20 tylli ki Seng bapher bapher la ïalam da ka Assam-Meghalaya Joint Protection Committee ha ryngkat ki nongïalam jong ka Federation of Khasi Jaintia and Garo People ha kaba ki la aiti ruh ïa ka dorkhas ha u Deputy Commissioner halor ka jingyrshah jong ki ban shna ïa ka Kulsi Dam Project.
Ha ka jingiakren bad ki lad pathai khubor ki la ong ruh ba kin ym ailad satia ban shna ia ka projek pynmih bording ha wah Khri (ba la tip ruh kum ka wah Kulsi sha ka jylla Assam) bad kin pynlong ia ki jingiakhih haduh ban da jaw snam.
