Shillong, Naitung, 12: Ka lehniam Behdeinkhlam ha ka sngi Saitjaiñ ka la poi sha ka sngi kaba ar kaba dei ka ‘Mulong’ bad la pyndep ïa ka Kñia Aitnar ba la pynlut pynsep da u Dolloi ka Elaka Jowai u Bah Puramon Kynjing bad ïa kane ka Knia Aitnar, la pyndep naduh ka por san shiteng baje mynstep.
Ha kane ka step ïa ka lehniam la sdang na iing u Dolloi bad hashwa ban aiti ïa ka blang lehniam ka la don ka nguh ka dem bad ka suit ka shor ha iing u Dolloi ryngkat ka jingïashim bynta lang da ki Kni ka Kur Kynjin ryngkat ki waheh wasan na ka liang ka Raid.
Ka Kñia Aitnar ka dei ka jingknia kaba kyrpang tam bad katkum ka hukum niam, ki phra dong lane ki Kmai Raij kim bit ban leit shaw ïa ka Deiñkhlam na khlaw katba ym pat pyndep ïa ka Kñia Aitnar.
Hashwa ba ki Kmai Raij kin leit rah ïa ki Deinkhlam jong ki na khlaw, ha ka por 11 baje mynstep, baroh ki shnong na Kmai Raij ki ïakynduh lang ha Mynkoipyrdi.
Katba ha ka por 3 baje noh phai sngi baroh ki Kmai Raij naduh ka Panaliar, Dulong, Loompyrdi ïongpiah, Loomïongkjam, Tpep Pale, Loomkyrwiang ki la wanrah ïa la ki Deinkhlam na khlaw ban pynpoi ïa ki ha Ïawmusiang.
Hadien kata pat ki Kmai Raij ki la leit shaw ïa ki Khon Raij na jaka ba pynshong thait ïa ka Khnong Blai bad ban pynpoi ïa ka ‘Khnong Blai’ ha Loom Sooïung bad nangta pat ki Kmai Raij kin leit phai ryngkat na kajuh ka lynti.
