Shillong, Naitung, 14: Ki dkhot jong ka Central Empower Committee ba la thung da ka Iingbishar Supreme Court ha ka Lah Sngi u Blei ki la hiar jurip ha ka shnong Killing, ka shnong kaba don ha Ri Bhoi District hadien ba uwei u nongshong shnong jong ka jylla Assam u Jitul Deka u la ujor sha ka Iingbishar Supreme Court da kaba kynnoh ba ka don ka jingtih khyndew beain bad ka jingpynjot mariang ha ka shnong Killing kaba don ha khappud bad ka Jylla Assam ka la wanrah ïa ka jingshlei um ha ka sor Guwahati bad ki bynta khappud jong ka jylla Meghalaya bad ka jylla Assam.
Dang ha ka 11 tarik, Naitung 2025 ki dkhot jong ka Central Empower Committee ki la leit jurip ïa ki kor tylliat maw, ka jingtih khyndew ha ka thain Killing bad kumjuh ruh ïa ka University of Science and Technology, Meghalaya ban tohkit bniah halor ki jingkynnoh ba ka don ka jingpynjot ïa ka mariang.
Ha kaba ïadei bad kane, u Deputy Commissioner jong ka Ri Bhoi District u Abhilash Baranwal ha ka jingïakren bad ki lad pathai khubor u la ïathuh ba ki bor synshar district ki la ïoh jingtip halor kane na ka tnad Forest ka sorkar Meghalaya bad la bynshet ha u Magistrate bad ïa ki Pulit ban synran lang ha ka jingjurip jong ki dkhot ka Central Empower Committee khnang ba kan ym don kano kano ka jingktah ïa ka shongsuk shongsain ki paidbah.
