Shillong, Naitung, 14: Ki nongïalam jong ka Federation of Khasi Jaintia and Garo People Upper Shillong Circle hapoh ka jingïalam jong u Asst.General Secretary u samla Hopewell Kharkongngor ryngkat ka jingdonlang jong u President ka FKJGP Bañiun Unit u Samla Bantei Nongkhlaw bad u President ka FKJGP Pomlum Unit Samla Donkupar Nongdhar, ha ka Lah Sngi u Blei ki la leit ban khang khyrdep bad beh lut ïa baroh ki nongtrei jong ka Post Office kaba don ha 7th Mer, Upper Shillong namar ka jingbym kheiñ snep bad ka jingbym burom ïa ka lehniam Behdieñkhlam.
Ha kawei pat ka bynta ka FKJGP Shillong City hapoh ka jingïalam jong u President u samla Arkinfield Khonglam ka la leit ban khang khyrdep ïa ka General Post Office kaba don ha nongbah Shillong.
Ha u kyrwoh ba la phah sha ki lad pathai khubor ryngkat bad ki video, ki nongïalam jong ka FKJGP Upper Shillong Circle bad kumjuh ruh ki nongïalam jong ka FKJGP Shillong City ki la phah ruh ïa u kyrwoh sha ki bor jong ka sorkar jylla bad ka sorkar pdeng ba ki dei ban pynmih da ka hukum ïa baroh ki shnat treikam ba ki dei ban burom ïa kino kino ki sngi kyrpang bad ki sngi khraw jong ka Jaitbynriew. Nalor kata ki la maham lypa ruh ba kin leh da kaba tyngeh ïa kino kino ki shlem treikam ki bym burom ïa ka lyngkhuh sngi ïap jong u Khlawait jong ka jaitbynriew Khasi u Syiem Tirot Sing ha kaba yn sa rakhe ha ka 17 tarik mynta u bnai Naitung, 2025.
