Shillong, Naitung, 14: Ka lehniam Behdieñkhlam kaba ju pynlong shisien shi snem da ka Seiñ Raij Jowai, ka la kut noh ha ka Lah Sngi u Blei da ka jingïashim bynta jong ki khun ka Seiñ Raij ha ka jingwanrah ïa ki ‘rot’ ha ka pung Aitnar bad ka jingpynhiar khatduh eh ïa ka “Khnong Blai.
Ha kane ka sngi, u Symbud Myntri Rangbah ka Jylla u Bah Sniawbhalang Dhar u la ai ka jingkyrkhu kyrdoh ïa ki khun ki hajar jong ka Seiñ Raij Jowai ha ryngkat ka jingsakhi lang jong Myntri ka Sorkar Jylla ba kynthup ïa ka Dr. Ampareen Lyngdoh bad u Bah Kyrmen Shylla, ki MLA ba kynthup ïa u Bah Sanbor Shullai bad u Bah Wailadmiki Shylla nalor u MP ka Rajya Sabha u Dr. WR. Kharlukhi, ki MDC ka Jaiñtia Hills Autonomous District Council (JHADC), ki ophisar sorkar nalor kiwei kiwei.
Ïa ka Behdienkhlam la pynkut ha pung Aitnar ha kaba da ki phew hajar ngut ki khun u Hynñiewtrep Hynñiewwasa kiba dang bat dang ksoh ha la ka niam tynrai na ri Khasi bad Jaiñtia kumjuh na kiwei ki Jylla bad nabar ri ki la wan ban sakhi bad ban ïashim bynta lang ha ka lehniam Behdeinkhlam.
Ka jinglehniam ha ka sngi pynkut, ka la sdang da ka lehniam ‘Kynting Khnong’ ha iingsah ka Lyngdoh bud sa ka ‘Bam Tyngkong’ bad hadien la pyndep ïa ka lehniam ‘Choh Thyndai’ kaba katkum ka jingngeit ka long ban beh ïa ki ksuid ki khrei, ka pang ka shitom bad ka sniew ka syar na iing na sem.
Ïa ka jinglehniam la pyndep da ki shakri niam naduh u Dolloi, ki Sangot, u Chutia nalor u Pator, u Langdoh, ka Langdoh bad kiwei kiwei ki shakri niam ka Raij. Katba ha ka nohphai sngi la pyndep ïa ka bynta ba kongsan jong ka lehniam Behdienkhlam ha Aitnar kaba long ka pung ktieh kyntang bad hangne ki shakri niam hapoh ka jingïalam u Pator ki la pynlong ïa ka nguh ka dem ha ka syiem Aitnar bad la pynbud pat sa ka jingwanrah ïa ka Khnong Blai ha kaba ki khun ka Niamtre ki la hiar ban shad ha pung kyntang.
Ka Sein Raij Shillong, Seng Khasi Kmie, Seiñ Tyllilang Niamtre Ladthadlaboh, Seiñ Raij Ummulong kumjuh ki Dorbar Shnong ba kynthup ka Loomiongkjam, Loomkyrwiang, Umshangiar, Panaliar, Dulong, Tpep Pale, Loompyrdi Iongpiah bad Ïawmusiang ki la wanrah ïa ki rot jong ki ha ryngkat ka khubor sha ka imlang ka sahlang.
Mynta ka kynti la wanrah haduh 13 tylli ki ‘rot’ ha Aitnar bad hadien ba ka wanrah lut baroh ki rot la pynhiar khatduh sa ïa ka ‘Khnong Blai’.
