Shillong, Naitung 15: Ka Captain Williamson Sangma State University (CWSSU) ka la khot ïa ka jingïalang kaba nyngkong jong ka Academic Council hapoh ka campus jong ka University ha Tura, West Garo Hills District ha ka 11 tarik mynta u bnai.
Ha kane ka jingïalang la wan ban ïashim bynta da baroh ki dkhot ka Academic Council ha kaba kane ka la buh ka dak ka nongrim ka jingkylla ha ka pule puthi jong kane ka University.
Ha ka sien shong jingïalang kaba nyngkong la shim ïa ki rai ban pynskhem ïa ki syllabus jong ka undergraduate bad postgraduate, bad ka jingai jingbit ïa ka Boards of Studies ban thaw ïa ki kyndon bapher bapher.
Baroh ki syllabus ba la mynjur ki long 15 tylli ïa ka postgraduate bad 21 tylli na ka bynta ki undergraduate, ba kynthup ïa ki subject na ka science, humanity, social science, commerce bad ki regional language.
Kine ki kynthup ïa ka subject Anthropology, Assamese, Biochemistry, Botany, Chemistry, Commerce, Economics, Education, English, Environmental Sciences, Garo, Geography, History, Khasi, Mathematics, Philosophy, Physics, Political Sciences, Social Work, Sociology bad Zoology.
Ka Board of Studies jong ki 21 undergraduate bad 15 postgraduate kaba la kynduh ha u bnai Jylliew 2025, ka la rai ban pynkhreh ïa ki syllabus kiba la long katkum ki jingkdew hapoh ka NEP 2020, ba pynthikna ba kan don ka jingmih kaba don nongrim, ka multidisciplinary, bad ka pule puthi kaba ïar.
Kane ka jingïalang ka pynpaw ïa ki sienjam ba kongsan na ka bynta ka jingtreikam jong ka CWSSU, ym tang ïa la ki tnat la jong, hynrei kumjuh ruh na ka bynta ki college kiba kwah ban pynïasoh hapoh ka University.
“Da ka jingjied ïa ki kyndon kiba kongsan halor ki kam pynrung klas, ka bai klas, ki jinglong jingman halor ki kam shakri bad ki kyndon pynïasoh, ka CWSSU mynta ka la pynkhreh pura ban sdang noh ïa ka academic session ba nyngkong ha ka snem 2025-26,” ïathuh u Registrar ka University u Bah A Ch Marak.
“Kane ka mawmer ka long ka jingmih kaba kongsan na ka bynta ka jylla baroh kawei bad ka thaiñ shatei lammihngi ka ri India, kaba la buh kyrdan ïa ka University kum ka pdeng jong ka higher education, ka academic excellence, bad ka regional empowerment,” u la ong.
