Shillong, Naitung, 15: Lai ngut ki briew ki la shah rai pynrem ban shong along 20 snem halor ka jingdonkti ban leh ïa ki kam runar hapoh ka Protection of Children from Sexual Offences (POCSO) Act.
Ha ka jingpynmih ïa ka rai ha ka 10 tarik mynta u bnai, u Special Judge (POCSO) Court, East Khasi Hills ula rai pynrem ïa ki lai ngut, kiba la tip kyrteng kum Raj Roy, u Ashit Chanda, bad u Prasenjit Das ha kaba ïadei bad ka case ba la register ha Sadar PS ha u snem 2013.
Ïa kine ki lai ngut la rai pynrem da kaba shong along 20 snem bad ban siew ruh ïa ka kuna kaba T.50 hajar marwei kum ka jingpynshitom hapoh ka Section 6 jong ka POCSO Act.
Lada kim lah ban siew ïa ka kuna, kin hap ban bteng ïa ka jingshong along sa hynriew bnai.
Shuh shuh, la rai pynrem ïa ki da kaba shong along bad daiñ kuna namar ka jingleh ïa ki kam runar hapoh ka Sections 12 bad 17 jong ka POCSO Act bad ka Section 506 jong ka IPC.
Ka jingpynshitom kaba bniah ka kynthup: 20 snem ka jingshah set along ryngkat bad ka kuna kaba T. 50,000 hajar na ka bynta ka kam runar katkum ka kyndon 6 jong ka POCSO Act, ar snem ka jingshah set along ryngkat ka kuna kaba T. 10,000 hajar na ka bynta ka kam runar hapoh ka kyndon 12 jong ka aiñ POCSO, 10 snem ka jingshah set along ryngkat bad ka kuna kaba T. 20,000 hajar na ka bynta ka kam runar katkum ka Section 17 jong ka POCSO Act bad ka jingshah set along kaba 2 snem ryngkat ka kuna kaba T. 10,000 hajar na ka bynta ka kam runar katkum ka kyndon 506 IPC.
Baroh ki jingpynshitom kin ïaid ryngkat ryngka. Ïa kane ka jingjia la bynshet ha ka WP Inspector M.M. U Momin kaba trei mynta ha Resubelpara, North Garo Hills.
Ïa kane la pyntip da u Superintendent of Police ka East Khasi Hills u Bah Vivek Syiem ha u kyrwoh ba la phah ha ka sngi Baar.
