Shillong, Naitung, 16: Ka Special Court ha Nongstoiñ, West Khasi Hills District ka la rai pynrem ïa ki arngut ki briew da kaba hukum ban set along shi rta jingim ryngkat ka jingdaiñ kuna kaba T. 50,000, hadien ba la shem ba ki dei kiba donkti ha ka kam leh be-ijot ïa kawei ka khynnah rit.
Ha ka 8 tarik, Jymmang, 2017, ki Pulit ki la ïoh pdiang ïa ka ejahar ba la kynnoh ba u Mebanlang Warjri bad u Tony Paul Basaïawmoit na ka shnong Pyndengumiong, Eastern West Khasi Hills ki la thombor da kaba leh be-ijot ïa kawei ka khynnah rit.
Ïa ka case la register ha Mairang Police Station hapoh ka Case No 22(05)2017 hapoh ka Section 5(g) /6 POCSO Act bad ïa ka jingtohkit la bynshet ha ka WPSI D.P Nongbri.
Katba ka jingtohkit ka dang ïaid, ïa u Mebanlang Warjri bad ïa u Tony Paul Basaïawmoit la kem noh da ki Pulit bad hadien kata la pynngat kyndon pyrshah ïa ki.
Ynda la pyndep ïa ka jingtohkit, ka Kashari jong u M. Kumar, Special Judge (POCSO), West Khasi Hills ka la pynmih ïa ka hukum ha ka 25/6/2025 ba la rai pynrem ïa ki arngut kiba la shah kynnoh bad hukum ban set along ïa ki shi rta jingim ryngkat bad ka jingdaiñ kuna kaba mar T. 50,000 hajar.
U Superintendent of Police jong ka Eastern West Khasi Hills u la pyntip ba la rai pynrem ïa kine ki arngut ha u kyrwoh ba la pynmih ha ka sngi Balang.
