Shillong, Naitung, 16: U Special Officer ba la thung da ka Ïingbishar Meghalaya High Court u Subhasis Chakrawarty ha ka sngi Balang u la kyntu ïa ki bor synshar ka East Khasi Hills District ban ïaid noh shakhmat ha kaba ïadei bad ka jingpynkynriah ïa ki nongdie madan na ka thaiñ Khyndai Lad katkum ki jingbthah jong ka Ïingbishar.
Ha ka jingïakren bad ki lad pathai khubor hadien ba la wai ka jingïalang ba la pynlong ha ophis ka Deputy Commissioner, u Chakrawarty u la ong ba ka jingïalang ka la long lyngba ka jingïathir ïatai kaba seisoh hapdeng ki kynhun kumno ban ïaid shakhmat ha kaba ïadei bad ka jingpynkynriah ïa ki nongdie madan bad ka jingsam ïa ki Certificates of Vending (CoV).
“Namarkata, ki bor synshar kin ïaid noh mynta shakhmat (bad ka jingpynkynriah) ha kaba ïadei bad ka rai ba la shim halor kane ka mat,” u la bynrap.
Haba kylli, u Special Officer u la pynpaw da kaba ong ba yn dang hap ban ap, “ngin sa peit kumno ka kam kan ïaid shakhmat. Ngi sa tip tad haduh ynda ka kam ka la tyllun.”
Ha ka jingïalang la ïashim bynta da ki ophisar na ka liang ki bor synshar ka East Khasi Hills District, ka Shillong Municipal Board (SMB), ki dkhot na ka Provisional Town Vending Committee (PTVC) bad ki nongmihkhmat na ka Meghalaya and Greater Shillong Progressive Hawkers and Street Vendors Association (MGSPHSVA).
Dang shen ha ka 13 tarik, Naitung, u Special Officer u la ai jingkut ïa ki bor synshar District ban ym kyndang ïa ki nongdie madan ha Khyndai Lad da kaba pynpaw ba ka hukum ba la pynmih da ka Ïingbishar Meghalaya High Court ha ka 3 tarik, Naitung, kaba la bthah ban pynkhreh ïa ka thup kyrteng jong kiba la ïohbor ne ki nongdie madan ba la ïohbor da kaba ïasyllok lang bad ka Hawkers’ Association bad ki bor synshar district.
