Shillong, Jylliew, 17: Ïa ka lyngkhuh sngi ïap kaba 190 snem jong u Syiem Tirot Sing la rakhe da kaba tei nam da u mot ba shirynñieng ha ka shnong Laitarted, Nongthliew, Eastern West Khasi Hills da ka Hynñiewtrep Youths’ Council (HYC) kaba hap ruh ha ka lyngkhuh snem ba 11 jong ka seng.
La plie paidbah ïa u mot teinam da u Syiem Khynnah ka Hima Nongkhlaw u Dr K M Syiemlieh bad u President jong ka Hynñiewtrep Youths’ Council (HYC) u Bah Roy Kupar Synrem ha kaba ïa don lang ki nongkitkam ba kynthup ïa u Bah Rhembor G Saibon, Bah Donboklang Kharlyngdoh, Bah Isaac Basaïawmoit, Bah Joplang Kharnaior bad kiwei kiwei.
Dr. K M Syiemlieh haba kren kum u kongsan, u la ïaroh ïa ka HYC na ka bynta ka kam ba radbah ban tei ïa u mot jong u Syiem Tirot Sing bad u la kyntu ïa ki samla ba kin bud ïa ka mynsiem ieit ri jong u Syiem Tirot Sing ha manla ki kam ba dei ban trei ha ka imlang sahlang ban kyntiew ïa la ki paradoh parasnam.
U Bah Roy Kupar Synrem u la pynpaw ka jingsngewnguh ïa ki nongïalam ba hashwa, ïa u Bah Peter Lawai bad u Bah Robert June Kharjahrin kiba la prat lynti ïa ka seng haduh ba u la ïohlad ban trei borbah na ka bynta ban teinam da u mot ba 24 pruh jong u Syiem bakhraw, u Tirot Sing.
Ha kane ka sngi la sakhi lang da ki barikor jong ka Riti Academy ba kynthup ïa u Bah Raphael Warjri, Bah Banteilang Hynñiewta, Bah Returnwell Sutong bad kiwei pat ba kynthup ïa Ialissing Mawrie, Banjop Leo Kharmalki, Ban Mawrie.
Ka jingrakhe ka la nang phuh shuh shuh da kaba la pyllait ïa ka kot lyngkdop halor ka jingïaleh laitluid jong u Syiem Tirot Sing bad ka kot halor ka synshar paidbah Khasi ba la thoh da u Bah Raphael Warjri ha ka ktien phareng ba la jer kyrteng, “Khasi Folk Democracy’
La pynbyrngia ïa kane ka jingrakhe da ki jingrwai na ki kaitor bad duhalia ba kynthuip ïa ka kynhun tem Snow White, ka Khmih Creative Society, ka Thunder Cave bad ka kynhun u Akbar Nongdhar.
