Shillong, Jylliew, 17: Ki Pulit ka East Khasi Hills ki la ïohkem ïa ki arngut ki briew, ba la tip kyrteng kum u Kenny Kharmujat 24 snem bad u Subroto Baidya 32 snem kiba sah ha ka shnong Lumshyiap, Nongmensong, ha kaba ïadei bad ka jingshah pajut jingdeng ksiar kaba la jia ha Polo ha ka sngi Balang.
Ïa ki arngut ba la kynnoh ba ki dei kiba donkti ban pajut ïa ka jingdeng ksiar na u ne kawei ka briew bym pat lah ban ithuh la suba ba ki dei ki nongdih drok bad tang shu dep leh ïa kane ka kam runar ki la phet bak sha Police Bazar lyngba ka surok na Jail Road.
Tang shu ïoh jingtip halor kane, ka kynhun ki Pulit ba lamkhmat da u SI I. Warjri, ryngkat ka jingsynran lang jong u UBC/AD Sangma bad ki Pulit ka Central Reserve Police Force (CRPF), ki la thwet bad kthong ïa ki arngut bad ïoh khang kdong ïa ki hajan ka Kim Hyundai showroom, Golflinks ha ka por kumba 11:45 baje shiteng miet.
Ïa ka jingdeng ksiar la ïoh kurup na ka met jong u Kenny Kharmujat.
U Superintendent of Police (City) Bah Herbert P. Kharkongor ha ka sngi Palei u la kyrpad ïa kino kino kiba shah tuh ne jah ka jingdeng ksiar ba kin wan shakhmat ban ai da ka ujor sha ki Pulit ka Sadar Police Station.
“Kane kan ïarap ïa ki Pulit ban ïoh leh ïa kaba donkam bad ban ïoh pynphai biang ïa ka jingdeng ksiar ba la ïoh kurup sha ki trai ba dei hok,” u la ong.
“Ki Pulit jong ka East Khasi Hills kin ïai bteng ban pynstet ïa ka jingpyntreikam, ban pynïoh ïa ka hok bad ka jingtreikam ba khuid jong ka aiñ bad kyntu ruh ïa ki nongshong shnong ban ïarap lem na ka bynta ban pynthikna ban pynïoh ïa ka hok,” la bynrap u SP.
